ភ្នំពេញ ៖ ស្នងការដ្ឋាននគរបាលខេត្តព្រៃវែងនាថ្ងៃ២៨ ធ្នូនេះបានចេញសេចក្តីបំភ្លឺលម្អិត ជុំវិញការផ្សាយតាមបណ្តាញ សង្គមហ្វេសប៊ុកអំពីសមត្ថកិច្ចបាញ់រះ លើប្រជាពលរដ្ឋនៅចំណុច ក អណ្ដើក លើផ្លូវជាតិលេខ១ ឃុំប្រាសាទ ស្រុកកំពង់ត្របែក កាលពីថ្ងៃ២៧ ធ្នូ ថា ការពិតហេតុការណ៍ផ្ទុះអាវុធនេះ គឺស្ថិតក្នុងពេលកងកម្លាំងនគរបាល នៃនាយកដ្ឋានព្រហ្មទណ្ឌ នៃអគ្គស្នងការ នគរបាលជាតិ កំពុងបំពេញប្រតិបត្តិការ តាមករណីចាប់ជំរិត ។
សេចក្តីបំភ្លឺរបស់ស្នងការខេត្តព្រៃវែង បានឲ្យដឹងថា ដោយស្មានថា រថយន្តម៉ាកស្តារិច ពណ៌ស ជារថយន្តចាប់ជំរិតមនុស្សព្រោះមានភិនភាគដូចគ្នា បន្ទាប់ពីបានទទួលព័ត៌មានសំងាត់ពីថ្នាក់លើ។
មូលហេតុដែលនាំឲ្យកម្លាំង នគរបាលព្រហ្មទណ្ឌ ផ្ទុះអាវុធដោយរថយន្តម៉ាកស្តារិច ត្រូវសមត្ថកិច្ចស្ទាក់ជាប់ ហើយតែមិនឈប់ ហើយថយបំបុកសមត្ថកិច្ច និងព្យាយាមបើករត់គេច ទាំងរថយន្តបិទស្កុតខ្មៅ ដែលសមត្ថកិច្ចពិបាក កំណត់មុខសញ្ញា ទើបសម្រេចចិត្តបំផ្ទុះអាវុធមុន ៕
