បាត់ដំបង ៖ លោក អ៊ុយ រី ប្រធានក្រុមប្រឹក្សាខេត្ត និងលោក សុខ លូ អភិបាលខេត្តបាត់ដំបង នៅថ្ងៃទី២៩ ខែធ្នូ ឆ្នាំ២០២៤ បានអញ្ជើញ ជាអធិបតីភាព ក្នុងពិធីបើកព្រឹត្តិការណ៍ ពិព័រណ៍ម្ហូបអាហារ និងបង្អែមខ្មែរ ក្រោមប្រធានបទម្ហូប អាហារដើម្បីទេសចរណ៍ ដើម្បីអបអរពិធីបុណ្យ ឆ្លងឆ្នាំសកល២០២៤- ២០២៥ ក៏ដូចជាបង្កបរិយាកាស សប្បាយរីករាយ ជូនដល់ប្រជាពលរដ្ឋ ភ្ញៀវទេសចរជាតិ និងអន្តរជាតិ ។
ពិព័រណ៍នេះធ្វើឡើង រយៈពេល៣ថ្ងៃ ចាប់ពីថ្ងៃទី២៩-៣១ ខែធ្នូ ឆ្នាំ២០២៤ នៅមុខបរិវេណ សារមន្ទីរ ប្រវត្តិសាស្ត្រខេត្ត បាត់ដំបង ក្នុងគោលបំណង ដើម្បីផ្សព្វផ្សាយពីមុខម្ហូបខ្មែរ វប្បធម៌ ប្រពៃណីដ៏សម្បូរបែប របស់អ្នកបាត់ដំបង សំដៅបង្កើនការទាក់ទាញភ្ញៀវជាតិ និងអន្តរជាតិ មកទស្សនាខេត្តបាត់ដំបង កាន់តែច្រើនឡើងបន្ថែមទៀត។
ក្រុមអាជីវករ ចាត់ទុកការ រៀបចំ ពិព័រណ៍ម្ហូបអាហារ និងបង្អែមខ្មែរ ពិតជាបានផ្ដល់ឱកាសយ៉ាង ទូលំទូលាយដល់អាជីវករ បាននាំយកនូវផលិតផលខ្មែរ ជាពិសេសផលិតផល ប្រចាំតំបន់មក តាំងបង្ហាញ ឱ្យភ្ញៀវបានស្គាល់ និងបានភ្លក្សរស់ជាតិម្ហូប អាហារដ៏សំបូរ បែបរបស់អ្នកបាត់ដំបង ។
ក្រុមអាជីវករ បានបង្ហាញអារម្មណ៍សប្បាយរីករាយ ដែលផលិតផលរបស់ពួកគាត់ ទទួលបានការគាំទ្រ ច្រើនពីសំណាក់ប្រជាពលរដ្ឋខ្មែរ ភ្ញៀវទេសចរជាតិ និងអន្តរជាតិ ។
ក្រុមអាជីវករ ថ្លែងអំណរគុណ ដល់លោកសុខ លូ អភិបាលខេត្តបាត់ដំបង ដែលបានផ្ដួចផ្ដើមរៀបចំ ឱ្យមានព្រឹត្តិការណ៍ ពិព័រណ៍ម្ហូបអាហារ ដែលជាការរួមចំណែកយ៉ាងសំខាន់ក្នុងការលើកកម្ពស់ផលិតផលខ្មែរ ។
បើតាមលោក ហម អរុណ អនុប្រធានមន្ទីរ និងជាអ្នកនាំពាក្យ នៃមន្ទីរទេសចរណ៍ខេត្តបាត់ដំបង បានឱ្យដឹងថា បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិជិត៤ម៉ឺននាក់ បានមកទស្សនាកម្សាន្តសប្បាយរីករាយ ក្នុងថ្ងៃដំបូងនៃព្រឹត្តិការណ៍ពិព័រណ៍ម្ហូបអាហារ និងបង្អែមខ្មែរដែលចំនួននេះ មានការកើនឡើងបើប្រៀបធៀបឆ្នាំ២០២៣។
សូមជម្រាបថា ក្រៅពីព្រឹត្តិការណ៍ ពិព័រណ៍ម្ហូប អាហារខ្មែររយៈពេល៣ថ្ងៃនេះរដ្ឋបាលខេត្ត ក៏បានរៀបចំព្រឹត្តិការណ៍ អមសំខាន់ៗ ជាច្រើនទៀតរួមមាន៖ព្រឹត្តិការណ៍ភូមិខ្មែរ ពិព័រណ៍ភូមិផលិតផលមួយ ស្ដង់ពិព័រណ៍ចម្រុះ ការប្រគុំតន្ត្រី ការអុជកាំជ្រួច និងរាប់ថយក្រោយឆ្លងឆ្នាំ នៅរាត្រីថ្ងៃទី៣១ ខែធ្នូ ឆ្នាំ២០២៤ ដើម្បីអបអរសាទរ ការឈានចូលឆ្នាំថ្មីឆ្នាំសាកល ដើម្បីបង្កភាពសប្បាយរីករាយ ជូនបងប្អូនប្រជាពលរដ្ឋ៕
