ចូហូ បារុ៖ ប្រទេសម៉ាឡេស៊ី ដែលជាប្រធានអាស៊ានប្ដូរវេននៅឆ្នាំនេះ នៅថ្ងៃទី១៨ ខែមករា ឆ្នាំ២០២៥ នេះបានប្រកាស់បេីកជាផ្លូវការនូវវេទិការទេសចរណ៍អាស៊ាន ឆ្នាំ២០២៥ (ATF 2025) ក្រោមអធិបតីភាពឧបនាយករដ្ឋមន្រ្តីម៉ាឡេស៊ីលោក YAB Dato’ Sri Haji Fadillah Bin Haji Yusof ក៏ដូចជាប្រមុខរដ្ឋចូហូ និងរដ្ឋមន្រ្តីក្រសួងទេសចរណ៍ វប្បធម៌ និងសិល្បៈម៉ាឡេស៊ី រដ្ឋមន្រ្តីក្រសួងទេសចរណ៍កម្ពុជាលោក ហួត ហាក់ និងរដ្ឋមន្រ្តីទេសចរណ៍មកពីបណ្ដាសមាជិកអាស៊ានផ្សេងទៀត។
ត្រូវបានបង្កើតឡើងក្នុងឆ្នាំ ១៩៨១ វេទិកាទេសចរណ៍អាស៊ាន (ATF) គឺជាព្រឹត្តិការណ៍ប្រចាំឆ្នាំ ដែលបង្ហាញពីតំបន់អាស៊ីអាគ្នេយ៍ជាគោលដៅទេសចរណ៍រួមមួយ ហេីយវេទិកានេះបានប្រមូលផ្តុំរដ្ឋមន្ត្រីទេសចរណ៍ តំណាងរដ្ឋាភិបាល ទីភ្នាក់ងារសារទេសចរណ៍ និងប្រព័ន្ធផ្សព្វផ្សាយមកពីប្រទេសអាស៊ានទាំង១០ រួមទាំងប្រទេសជាច្រេីនទៀតទាំងក្នុង និងក្រៅតំបន់។
នៅក្នុងនោះដែរវេទិកាទេសចរណ៍អាស៊ាន រួមមានកិច្ចប្រជុំថ្នាក់រដ្ឋមន្រ្តី ពិព័រណ៍ពាណិជ្ជកម្ម ការផ្លាស់ប្ដូរព័ត៌មាន និងទំនាក់ទំនងក្នុងវិស័យទេសចរណ៍ន (TRAVEX) និងសន្និសីទផ្សេងៗ ដោយផ្តោតលើប្រធានបទដូចជា ទេសចរណ៍ប្រកបដោយនិរន្តរភាព និងការផ្លាស់ប្តូរបែបឌីជីថលជាដេីម។
ក្រោមប្រធានបទ “Unity in Motion, Shaping ASEAN’s Tourism Tomorrow” ការរៀបចំវេទិកាទេសចរណ៍របស់អាស៊ាន” ATF ឆ្នាំ២០២៥ ប្តេជ្ញាកសាងឧស្សាហកម្មទេសចរណ៍អាស៊ានឱ្យរឹងមាំ និងប្រកបដោយនិរន្តរភាព។
ឧបនាយករដ្ឋមន្រ្តីម៉ាឡេស៊ីលោក YAB Dato’ Sri Haji Fadillah Bin Haji Yusof បានឧ្យដឹងថា វេទិកានេះស្វែងរកការជំនះឧបសគ្គបច្ចុប្បន្ន និងជម្រះផ្លូវសម្រាប់អនាគតដ៏រុងរឿងដោយប្រើប្រាស់សមត្ថភាពរួម និងគោលដៅរួមនៃប្រទេសជាសមាជិករបស់ខ្លួន។
លោកបានលេីកឡេីងថា “ចូលរួមជាមួយពួកយើងនៅ ATF 2025 នៅពេលដែលយើងធ្វើការរួមគ្នាដើម្បីអភិវឌ្ឍឧស្សាហកម្មទេសចរណ៍ដ៏រស់រវើក និងជោគជ័យសម្រាប់អនាគតអាស៊ាន។ រួមគ្នា យើងអាចបង្កើតអនាគតមួយ ដែលមនុស្សជុំវិញពិភពលោកចាប់អារម្មណ៍ និងបំផុសគំនិតដោយទេសភាពធម្មជាតិដ៏អស្ចារ្យរបស់អាស៊ីអាគ្នេយ៍ បេតិកភណ្ឌវប្បធម៌ដ៏សម្បូរបែប និងរឿងរ៉ាវបំផុសគំនិតជាច្រេីនទៀត”។
សូមជម្រាបថា វេទិកាទេសចរណ៍អាស៊ានឆ្នាំ២០២៥ បាននិងកំពុងប្រារព្ធឡើងចាប់ពីថ្ងៃទី១៧ ដល់ថ្ងៃទី២១ ខែមករា រួមជាមួយកិច្ចប្រជុំថ្នាក់រដ្ឋមន្រ្តីទេសចរណ៍អាស៊ានលើកទី២៨ កិច្ចប្រជុំថ្នាក់រដ្ឋមន្រ្តីទេសចរណ៍អាស៊ានបូក៣លើកទី២៤ (ចិន ជប៉ុន និងកូរ៉េ) កិច្ចប្រជុំថ្នាក់រដ្ឋមន្រ្តីទេសចរណ៍អាស៊ាន-ឥណ្ឌាលើកទី១២ កិច្ចប្រជុំថ្នាក់រដ្ឋមន្រ្តីទេសចរណ៍អាស៊ាន-រុស្ស៉ីលើកទី៤ និងកិច្ចប្រជុំពាក់ព័ន្ធផ្សេងទៀត។
ព្រឹត្ដិការណ៍នេះ គឺជាការចាប់ផ្តើមនៃការផ្លាស់ប្តូរការនៃវិស័យទេសចរណ៍នៅក្នុងតំបន់ ក្នុងគោលបំណងជំរុញការតភ្ជាប់អាជីវកម្មនៅក្នុងវិស័យទេសចរណ៍អាស៊ាន ក្រោមប្រធានបទ “រួបរួមក្នុងចលនា, បង្កើតទិសដៅទេសចរណ៍របស់អាស៊ាននៅថ្ងៃស្អែក” ដោយសង្កត់ធ្ងន់លើកិច្ចសហការក្នុងតំបន់ក្នុងការផ្សព្វផ្សាយទេសចរណ៍
ASEAN Travel Exchange (TRAVEX) ជាវេទិកាសម្រាប់អ្នកជំនាញក្នុងឧស្សាហកម្មទេសចរណ៍ ដើម្បីភ្ជាប់ទំនាក់ទំនង និងស្វែងយល់ពីគ្នាទៅវិញទៅមក ក៏ដូចជាការស្វែងរកឱកាសទេសចរណ៍នៅអាស៊ីអាគ្នេយ៍។ អ្វីដែលគួរឧ្យកត់ស្គាល់នោះ វេទិកាទេសចរណ៍អាស៊ាននៅឆ្នាំនេះធ្វេីឡេីង ខណៈប្រទេសម៉ាឡេស៊ី ក៏កាន់តំណែងជាប្រធានប្ដូរវេនអាស៊ានផងដែរ៕
