ភ្នំពេញ៖ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការការបរទេស និងសហប្រតិបត្តិការអន្តរជាតិ លោក តាន់ ហ្សង់ហ្វ្រង់ស័រ បានលើកឡើងថា ដើម្បីឆ្លើយតបទៅនឹងស្ថានភាព មិនជាក់លាក់របស់ពិភពលោក រាជរដ្ឋាភិបាលកម្ពុជា បានបន្តអនុវត្តនយោបាយការបរទេស ដែលមានភាពបត់បែនបំផុត ដើម្បីរួមចំណែកការពារសន្តិភាពក្នុងពិភពលោក ។
ក្នុងវេទិកាសារព័ត៌មានលើកទី៦ ស្តីពី “រាជរដ្ឋាភិបាល នីតីកាលទី៧ នៃរដ្ឋសភា ជាក្តីសង្ឃឹមរបស់ពលរដ្ឋខ្មែរ”នាថ្ងៃ២៧ កុម្ភៈ លោក តាន់ ហ្សង់ហ្វ្រង់ស័រ បានមានប្រសាសន៍ថា អ្វីដែលប៉ះពាល់ពិភពលោកគង់តែបណ្តាលឲ្យ មានផលប៉ះពាល់ទៅតំបន់អាស៊ីប៉ាស៊ីហ្វិក អាស៊ីអាគ្នេយ៍ និងកម្ពុជាជាដើម ប៉ុន្តែកម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត កម្ពុជាបានយល់ដឹងពីភាពផុយស្រួយនៃស្ថានភាពសកល ដូច្នេះដើម្បីត្រៀមលក្ខណៈឆ្លើយតបបញ្ហាជាសកលនេះ សម្តេចធិបតីបានដឹកនាំនយោបាយការបរទេស ដោយភាពបត់បែនទៅតាមស្ថានការណ៍ផងដែរ។
លោកបន្តថា “ដើម្បីឆ្លើយតបទៅនឹងស្ថានភាពមិនជាក់លាក់ ទាល់តែសោះរបស់ពិភពលោក តំបន់ និងទីតាំងភូមិសាស្រ្តនៃកម្ពុជាយើង រាជរដ្ឋាភិបាលមិនត្រឹមតែត្រូវពង្រឹងភាពធុន នៃសេដ្ឋកិច្ចជាតិយើងប៉ុណ្ណោះទេ តែត្រូវបន្តអនុវត្តនៃគោលនយោបាយការបរទេសមួយ ដែលមានភាពបត់បែន ។ ក្នុងន័យអនុវត្តគោលនយោបាយការបរទេស ដែលត្រូវបានកំណត់ដោយគណបក្សប្រជាជនកម្ពុជា រាជរដ្ឋាភិបាលរបស់សម្តេចបវរធិបតី ហ៊ុន ម៉ាណែត បានការពារផលប្រយោជន៍ស្នូលកម្ពុជា ឯករាជ្យ អធិបតេយ្យ បូរណភាពទឹកដី សន្តិភាព និងស្ថិរភាពសង្គម ។ ការពារគម្រូអភិវឌ្ឍន៍សង្គមសេដ្ឋកិច្ចដែល ឈរលើស្តង់ដារជាក់ស្តែងរបស់កម្ពុជាខ្លួនឯង” ។
លោក តាន់ ហ្សង់ហ្វ្រង់ស័រ សង្កត់ធ្ងន់ថា រាជរដ្ឋាភិបាលក៏បានប្តេជ្ញាថា នឹងមិនឲ្យបរទេសណាមកជ្រៀតជ្រែក កិច្ចការផ្ទៃក្នុងកម្ពុជានោះទេ ដោយត្រូវអនុវត្តគោលនយោបាយការបរទេសមួយ ឈរលើមូលដ្ឋានឯករាជ្យតាមគោលការណ៍ច្បាប់អន្តរជាតិ ធម្មនុញ្ញភាពអង្គការសហប្រជាជាតិ និងរដ្ឋធម្មនុញ្ញរបស់កម្ពុជា។
រដ្ឋមន្ត្រីប្រតិភូអមនាយករដ្ឋមន្ត្រីរូបនេះអះអាងទៀតថា ក្រៅនេះក៏ពង្រឹងទំនាក់ទំនងជាមួយ បណ្តាប្រទេសនានានៅជុំវិញពិភពលោក ដើម្បីឲ្យរួមចំណែកកាន់តែសកម្ម ក្នុងបុព្វហេតុការពាររក្សាសន្តិភាព និងស្ថិរភាពក្នុងតំបន់និងពិភពលោក ៕
