កំពង់ស្ពឺ៖ ការរក្សាបាននូវសុខសន្តិភាព និងស្ថេរភាព នយោបាយគឺ ជាបុរេលក្ខខណ្ឌដ៏ចាំបាច់ និងជា មូលដ្ឋានគ្រឹះដ៏រឹងមាំសម្រាប់ ការអភិវឌ្ឍប្រទេសជាតិលើគ្រប់វិស័យ និងធានាបាននូវ សុខុមាលភាព និង ការរស់នៅ ប្រកបដោយសុខដុមរមនារបស់ ប្រជាជន គ្មានសន្តិភាព គឺគ្មានអ្វីៗគ្រប់យ៉ាង លោកជំទាវ ទឹម សាវ៉ាតមានប្រសាសន៍ដូច្នេះគ្នាដែលលោកស្រីអញ្ជើញជាអធិបតីភាពក្នុងកិច្ចប្រជុំផ្សព្វផ្សាយ និងពង្រឹងចលនាស្ត្រីនៅសាលាស្រុកថ្ពង។
លោកស្រីបានបន្តទៀតថា ក្រោមម្លប់នៃសុខសន្តិភាព និងកិច្ចអភិវឌ្ឍន៍ ស្ត្រីកម្ពុជា ជាកម្លាំងចលករ ដែលបានរួមចំណែក នៃកំណើន សេដ្ឋកិច្ចកន្លងមក ហើយបច្ចុប្បន្នស្ត្រី មានកាឡានុវត្តភាព ក្នុងការអនុវត្តសិទ្ធអភិវឌ្ឍន៍ ចំណេះដឹង ជំនាញ និងបច្ចេកទេស ដែលជាមូលដ្ឋានគ្រឹះក្នុងការចូលរួមប្រកួតប្រជែងប្រកបដោយសក្តានុពលនៅក្នុងទីផ្សារសេដ្ឋកិច្ចថ្នាក់ជាតិ និងនៅក្នុងតំបន់ ហើយក៏ជាអ្នកទទួលបានភាគផលពីកិច្ចអភិវឌ្ឍលើគ្រប់វិស័យ ដែលធ្វើអោយ ជីវភាពរស់នៅរបស់ពួកគាត់ និងគ្រួសារ មានភាពប្រសើរឡើង រួមចំណែកយ៉ាងសំខាន់ ក្នុងការ កាត់បន្ថយភាពក្រីក្រ និង ងាយរងគ្រោះ ។ ក្នុងន័យនេះ ការបន្តរក្សាបាននូវសុខសន្តិភាព នៅតែជា អាទិភាព ចម្បងទីមួយ និងមានតម្លៃមិនអាចកាត់ថ្លៃ បាន សម្រាប់ប្រជាពលរដ្ឋកម្ពុជាគ្រប់រូបផងដែរ។
សូមបញ្ជាក់ថាថ្ងៃទី២៩ ខែមីនា ឆ្នាំ២០២៥ លោកស្រី ទឹម សាវ៉ាត ទីប្រឹក្សាសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងមានការអញ្ជើញចូលរួមពីសំណាក់លោក ទួន សុង សមាជិកក្រុមប្រឹក្សាស្រុក និងលោកស្រីប្រធាន អនុប្រធានមន្ទីរ និងស្រុកជាច្រើនរូបទៀត៕
ដោយ៖ សុខ សុភ័ណ្ឌ/ រូបថតមន្ទីរព័ត៌មាន
