ភ្នំពេញ ៖ ក្រុមមន្រ្តីនគរបាលចរាចរណ៍ ដែលមានការរិះគន់ចំពោះសកម្មភាពរុះរើប៉ារាស់ ទៅទីតាំងថ្មីដោយមិនទាន់ចប់ម៉ោងនៃការអនុវត្តច្បាប់ចរាចរណ៍ផ្លូវគោក ដោយសារតែមានបញ្ហានោះ ត្រូវបានទទួលរងពិន័យពីថ្នាក់លើ ។
យោងតាមសេចក្តីបំភ្លឺព័ត៌មានរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាលនាថ្ងៃ៣ មេសា បានឲ្យដឹងថា ក្រោយឃើញការផ្សាយក្នុងគណនីហ្វេសប៊ុកឈ្មោះ Lay Kongkea ដែលបានបង្ហោះវីដេអូ សកម្មភាពមន្រ្តីនគរបាលចរាចរណ៍ដាក់គោលដៅអនុវត្តរឹតបន្តឹងច្បាប់ចរាចរណ៍ផ្លូវគោក នៅព្រឹកថ្ងៃទី២ ខែមេសា ឆ្នាំ២០២៥ ចំណុចផ្លូវជាតិលេខ៣ ចន្លោះគីឡូម៉ែត្រលេខ២៨-២៩ ឋិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល នៅរសៀលម៉ោង១៤.០០នាទីថ្ងៃខែដដែល ក្រុមការងារថ្នាក់ស្នងការដ្ឋាននគរបាលខេត្ត បានធ្វើការស្រាវជ្រាវបឋម។
លុះព្រឹកថ្ងៃទី៣ ខែមេសា ឆ្នាំ២០២៥ ការិយាល័យបុគ្គលិក នៃស្នងការដ្ឋាននគរបាលខេត្តកណ្តាល បានកោះហៅកងកម្លាំងនគរបាលចរាចរណ៍ផ្លូវគោកចំនួន៧នាក់ ឲ្យចូលខ្លួនមកបំភ្លឺ ពាក់ព័ន្ធហេតុការណ៍ដែលបានកើតឡើងនេះ។
ក្រោយពីសាកសួរ និងឆ្លើយបំភ្លឺរួច មន្រ្តីនគរបាលចរាចរណ៍ដែលមានការពាក់ព័ន្ធក្នុងហេតុការណ៍នេះ ត្រូវបានព្រមានជាលាយលក្ខណ៍អក្សរលើកទី១ ចំនួន៤នាក់ និងអប់រំ ។ ក្នុងនោះក៏បានធ្វើកិច្ចសន្យាចំនួន៣នាក់ ហើយដាក់ឲ្យអនុវត្តវិន័យរយៈពេល ៣ខែ នៅការិយាល័យបុគ្គលិក។
សូមបញ្ជាក់ថា កាលពីថ្ងៃ២ មេសា គណនីហ្វេសប៊ុកឈ្មោះ Lay Kongkea បានបង្ហោះវីដេអូ សកម្មភាពមន្រ្តីនគរបាលចរាចរណ៍ដាក់គោលដៅអនុវត្តរឹតបន្តឹងច្បាប់ចរាចរណ៍ផ្លូវគោកដោយបាននិយាយថា “នៅពេលស្ទាក់រថយន្តគាត់មានបញ្ហាចាប់ផ្តើមរើប៉ារាស់ដោយមិនទាន់ចប់ម៉ោង”៕
