វិមានក្រមឡាំង ធ្វើសេចក្តីប្រកាសព័ត៌មាន អំពីជំនួបពិភាក្សាជាមួយនឹង ទីក្រុងវ៉ាស៊ិនតោន

បរទេស៖ យោងតាមការចេញផ្សាយរបស់ RT វិមានក្រឹមឡាំងបាននិយាយកាលពីថ្ងៃសុក្រថា ដំណើរទស្សនកិច្ចទៅកាន់ទីក្រុងវ៉ាស៊ីនតោន របស់បេសកជនវិនិយោគរបស់ប្រធានាធិបតី Vladimir Putinបានបង្ហាញពីសុទិដ្ឋិនិយមប្រុងប្រយ័ត្ន ចំពោះការធ្វើឱ្យទំនាក់ទំនងរវាងរុស្ស៊ី និងសហរដ្ឋអាមេរិកមានលក្ខណៈធម្មតា។

លោក Kirill Dmitriev ប្រធានមូលនិធិវិនិយោគផ្ទាល់របស់រុស្ស៊ី បានធ្វើដំណើរទៅកាន់ទីក្រុងវ៉ាស៊ីនតោន ក្នុងសប្តាហ៍នេះសម្រាប់ដំណើរទស្សនកិច្ចរយៈពេលបីថ្ងៃ ដើម្បីពិភាក្សាអំពីជំហានឆ្ពោះទៅរក ការស្តារទំនាក់ទំនងទ្វេភាគីឡើងវិញ។
កាលពីមុនលោកក៏ធ្លាប់បានចូលរួម ក្នុងកិច្ចចរចានៅទីក្រុងរីយ៉ាដ និងជាមន្ត្រីជាន់ខ្ពស់រុស្ស៊ីដែលទៅ សហរដ្ឋអាមេរិកចាប់តាំងពីដំណើរទស្សនកិច្ចការទូត ត្រូវបានផ្អាកនៅឆ្នាំ ២០២២ផងដែរ។

ដោយពណ៌នាអំពីកិច្ចប្រជុំរបស់គាត់ ជាមួយមន្ត្រីសេតវិមាន លោក Dmitriev បានប្រាប់អ្នកសារព័ត៌មានកាលពីថ្ងៃព្រហស្បតិ៍ថា រុស្ស៊ី និងសហរដ្ឋអាមេរិកបាន បោះជំហានទៅមុខបីជំហានដ៏សំខាន់ ក្នុងរយៈពេលពីរថ្ងៃកន្លងមកនេះ។

តាមសេចក្តីរាយការណ៍ថា លោកបានជួបជាមួយប្រេសិតមជ្ឈិមបូព៌ារបស់លោក Trump គឺលោក Steve Witkoff ដែលជាអ្នកចរចាដ៏សំខាន់មួយរូប របស់សហរដ្ឋអាមេរិកស្តីពីអ៊ុយក្រែន ហើយដោយឡែកកាសែត NBC News ក៏បានរាយការណ៍ដែរថាលោក Dmitriev ក៏បានជួបពិភាក្សាជាមួយសមាជិកព្រឹទ្ធសភា មកពីគណបក្សសាធារណរដ្ឋ Lindsey Graham និង Markwayne Mullin ផងដែរ៕

ប្រែសម្រួល៖ ស៊ុន លី