ភ្នំពេញ៖ លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ បានអំពាវនាវដល់បងប្អូនអាជីវករអ្នកលក់ដូរ តាមបណ្តោយផ្លូវថ្មើរជើង គឺហាមមិនឱ្យក្រាលកន្ទេលលក់ដូរ និងអង្គុយញាំលើស្មៅលើសួនច្បារ ដែលបណ្តាលឱ្យងាប់ស្មៅ ងាប់ផ្កា និងប៉ះពាល់ដល់បរិស្ថាន។

ការអំពាវរបស់លោកស្រី ដោ សម្ផស្ស ខាងលើនេះ ធ្វើឡើងបន្ទាប់ពីមួយរយៈកន្លងមកនេះ គេសង្កេតឃើញមានការក្រាលកន្ទេលលក់ និងមានអ្នកអង្គុយញាំលើស្មៅ និងចាក់កាកសំណល់តាមមាត់លូ ហើយថែមទាំងមានអ្នកទិញ កាន់មកញាំលើស្មៅដែរ ។ ក្នុងន័យនេះទាំងអ្នកលក់និងអ្នកទិញ ត្រូវហាមមិនអោយអង្គុយលើស្មៅដាច់ខាត។

លោកស្រី ដោ សម្ផស្ស គូសបញ្ជាក់ថា ផ្លូវថ្មើរជើងជាតំបន់ស្ងួត ហាមលេងបាញ់ទឹកជះទឹក។ តែបើបងប្អូនចង់បានតំបន់ត្រជាក់ចិត្ត សូមទៅលេងនៅសង្គ្រាន្តវត្តភ្នំ ជុំវិញបរិវេណរមណីយដ្ឋានវប្បធម៌ប្រវត្តិសាស្ត្រវត្តភ្នំ ដែលរដ្ឋបាលរាជធានីភ្នំពេញ បានរៀបចំសង្គ្រាន្តវត្តភ្នំ ដើម្បីផ្តល់ឱកាសជូនបងប្អូនប្រជាពលរដ្ឋ រួមទាំងភ្ញៀវទេសចរណ៍ជាតិ អន្តរជាតិ មានកន្លែងលេងកំសាន្តសម្បូរបែប និងច្រើនទីតាំង ក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ សប្តស័ក្ត ព.ស២៥៦៩ ត្រូវនឹងគ.ស២០២៥ ដែលពិធីបុណ្យចូលឆ្នាំថ្មី នឹងប្រព្រឹត្តទៅរយៈពេល៣ថ្ងៃ គឺពីថ្ងៃទី១៤ដល់១៦មេសា។

គួរឱ្យដឹងថា នៅល្ងាចថ្ងៃសៅរ៍ទី៥ ខែមេសា ដែលជាសប្តាហ៍ទី១នៃខែថ្មី លោក ឃួង ស្រេង អភិបាលរាជធានីភ្នំពេញ និងលោកស្រី បានអញ្ជើញអមដំណើរលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានអញ្ជើញទៅពិនិត្យមើល ស្ថានភាពជាក់ស្តែង នៅតាមបណ្តោយផ្លូវថ្មើរជើងមាត់ទន្លេ ដោយលោក ឃួង ស្រេង បានធ្វើការណែនាំបន្ថែមដល់អាជ្ញាធរ និងសមត្ថកិច្ចពាក់ព័ន្ធ ត្រូវយកចិត្តទុកដាក់ទៅលើបញ្ហាសន្តិសុខ សណ្តាប់ធ្នាប់ របៀបរៀបរយសាធារណៈ ឱ្យបានល្អប្រសើរ ដោយត្រូវធានាថា ទាំងសង្គ្រាន្តវត្តភ្នំ និងផ្លូវថ្មើរជើង ក្នុងឱកាសបុណ្យចូលឆ្នាំថ្មីនេះ ប្រព្រឹត្តទៅដោយរលូននិងផ្តល់ភាពសប្បាយរីករាយ ដល់ប្រជាពលរដ្ឋនៅរាជធានីភ្នំពេញ និងបងប្អូនមកពីតាមបណ្តាខេត្ត រួមទាំងភ្ញៀវទេសចរបរទេសផង បានសប្បាយរីករាយ និងមានភាពកក់ក្តៅ ។

តាមបណ្តោយផ្លូវថ្មើរជើង រដ្ឋបាលរាជធានីភ្នំពេញ បានរៀបចំឲ្យិមានការលក់ដូរ លើដងផ្លូវនាពេលរាត្រីភាគច្រើន ជាផលិតផលផលិតដោយដៃ រួមទាំងការរៀបចំ ឱ្យមានការសម្តែងសិល្បៈបុរាណសម័យច្រើនទម្រង់ ដើម្បីទាក់ទាញភ្ញៀវទេសចរ៍ ឱ្យចូលមកលេងកំសាន្ត២ថ្ងៃ ក្នុងមួយសប្តាហ៍គឺថ្ងៃសៅរ៍ និងថ្ងៃអាទិត្យ។ ដោយឡែកសម្រាប់ពិធីបុណ្យចូលឆ្នាំ៣ថ្ងៃ រដ្ឋបាលរាជធានីភ្នំពេញ នឹងបើកឱ្យមានការលេងកំសាន្ត បន្ថែម៣ថ្ងៃទៀត។

បន្ថែមលើនេះ លោកអភិបាលរាជធានីភ្នំពេញ បានអំពាវនាវឱ្យបងប្អូនអាជីវករលក់ដូរ នៅ ផ្លូវថ្មើរជើង ក៏ដូចបងប្អូនដែលមកលេងកំសាន្ត ឱ្យចូលរួមលើកកម្ពស់អនាម័យបរិស្ថាន, វេចខ្ចប់កាកសំណល់ហូបចុករួច ត្រូវច្រកក្នុងថង់រួមយកទៅដាក់ក្នុងធុងសំរាម ដែលនៅជិតបងប្អូន។ ទីក្រុងស្អាត មានអនាម័យល្អ គឺ ផ្តើមចេញពីយើងៗម្នាក់ និងធ្វើខ្លួនជាប្រជាពលរដ្ឋ រស់នៅក្នុងទីក្រុងដែលស៊ីវិល័យ និងថ្លៃថ្នូរ៕






