ភ្នំពេញ៖ កម្មសិទ្ធិបញ្ញាដើរតួនាទីយ៉ាងសំខាន់ក្នុងការជំរុញការច្នៃប្រឌិត ការអភិវឌ្ឍសេដ្ឋកិច្ច និងការលើកកម្ពស់វប្បធម៌។ ដើម្បីបង្កើនការយល់ដឹងអំពីសារៈសំខាន់នេះ សមាគមកម្មសិទ្ធិបញ្ញាកម្ពុជា (IPAC) បានសហការជាមួយសាកលវិទ្យាល័យបៀលប្រាយ (BBU) និងក្រសួងពាក់ព័ន្ធនានា រៀបចំសិក្ខាសាលាស្តីពី “ការយល់ដឹងអំពីកម្មសិទ្ធិបញ្ញានៅកម្ពុជា” ដែលប្រព្រឹត្តទៅនៅ BBU នាព្រឹកថ្ងៃអង្គារ ទី២០ ខែឧសភា ឆ្នាំ២០២៥ ។ សិក្ខាសាលានេះមានការចូលរួមពីនិស្សិតជំនាញនីតិសាស្ត្រ ព្រមទាំងវាគ្មិនជាអ្នកជំនាញក្នុងវិស័យកម្មសិទ្ធិបញ្ញា ដែលមានគោលបំណងសំខាន់ៗដូចជា ការផ្ដល់ចំណេះដឹងអំពីច្បាប់កម្មសិទ្ធិបញ្ញា ការលើកកម្ពស់ការការពារស្នាដៃ និងការជំរុញការគោរពសិទ្ធិអ្នកនិពន្ធ ។
ខ្លឹមសារដ៏សំខាន់មួយដែលត្រូវបានលើកឡើងក្នុងសិក្ខាសាលាគឺ ទិដ្ឋភាពទូទៅនៃសិទ្ធិអ្នកនិពន្ធនៅកម្ពុជា ។ វាគ្មិនបានបង្ហាញយ៉ាងក្បោះក្បាយអំពីច្បាប់ និងបទប្បញ្ញត្តិពាក់ព័ន្ធ រួមទាំងការធ្វើវិសោធនកម្មច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល ដើម្បីឆ្លើយតបទៅនឹងការប្រែប្រួលនៃសង្គម និងបច្ចេកវិទ្យា ។ យោងតាមឯកសារដែលបានបង្ហាញ កម្ពុជាបានចាប់ផ្តើមតាក់តែងច្បាប់កម្មសិទ្ធិបញ្ញាជាច្រើន រួមមាន ច្បាប់ស្ដីពីសិទ្ធិអ្នកនិពន្ធនិងសិទ្ធិប្រហាក់ប្រហែល ដែលមាន ៨ ជំពូក និង ៦៩ មាត្រា ហើយបច្ចុប្បន្នកំពុងស្ថិតក្នុងដំណើរការនៃការធ្វើវិសោធនកម្មជាលើកដំបូង ។
លើសពីនេះ សិក្ខាសាលាក៏បានផ្ដោតលើគោលនយោបាយជាតិស្ដីពីកម្មសិទ្ធិបញ្ញា ដែលមានគោលដៅលើកកម្ពស់កិច្ចការពារកម្មសិទ្ធិបញ្ញា ការបង្កើតស្នាដៃ និងការជំរុញការប្រើប្រាស់កម្មសិទ្ធិបញ្ញាសម្រាប់ការស្រាវជ្រាវ និងអភិវឌ្ឍន៍ ។ គោលនយោបាយជាតិនេះគ្របដណ្ដប់វិស័យសំខាន់ៗចំនួន ៧ រួមមាន កសិកម្ម ពាណិជ្ជកម្ម វិទ្យាសាស្ត្រនិងបច្ចេកវិទ្យា សុខាភិបាល វប្បធម៌ ទេសចរណ៍ និងការអប់រំ ។ ការចុះបញ្ជីកម្មសិទ្ធិបញ្ញា ដូចជា ពាណិជ្ជសញ្ញា និងប៉ាតង់ ក៏ត្រូវបានពិភាក្សាយ៉ាងស៊ីជម្រៅផងដែរ ។ វាគ្មិនមកពីក្រសួងពាណិជ្ជកម្មបានធ្វើបទបង្ហាញអំពីការចុះបញ្ជីម៉ាកជាតិ និងអន្តរជាតិ ព្រមទាំងនីតិវិធីនៃការចុះបញ្ជី ។
សិក្ខាសាលានេះបានផ្ដល់អត្ថប្រយោជន៍យ៉ាងច្រើនដល់និស្សិត និងអ្នកចូលរួម ។ ពួកគេបានបង្កើនចំណេះដឹង និងការយល់ដឹងអំពីកម្មសិទ្ធិបញ្ញា ដែលជាជំនាញដ៏សំខាន់សម្រាប់ពួកគេក្នុងការសិក្សា និងអាជីពនាពេលអនាគត ។ ជាពិសេស និស្សិតនីតិសាស្ត្រអាចយល់កាន់តែច្បាស់អំពីក្របខ័ណ្ឌច្បាប់ និងការអនុវត្តកម្មសិទ្ធិបញ្ញា ដែលនឹងជួយពួកគេក្នុងការប្រកបវិជ្ជាជីវៈជាមេធាវី ចៅក្រម ឬអ្នកប្រឹក្សាច្បាប់។ លើសពីនេះ សិក្ខាសាលានេះបានលើកទឹកចិត្តដល់និស្សិតឱ្យមានការច្នៃប្រឌិត និងបង្កើតស្នាដៃថ្មីៗ ដោយជំរុញឱ្យពួកគេការពារសិទ្ធិរបស់ខ្លួន និងគោរពសិទ្ធិអ្នកដទៃ។
សិក្ខាសាលានេះមានឥទ្ធិពលវិជ្ជមានទៅលើវិស័យពាក់ព័ន្ធជាច្រើន។ នៅក្នុងវិស័យច្បាប់ វាជួយពង្រឹងការអនុវត្តច្បាប់កម្មសិទ្ធិបញ្ញា និងបង្កើតវប្បធម៌នៃការគោរពសិទ្ធិ។ នៅក្នុងវិស័យសេដ្ឋកិច្ច វាជំរុញការវិនិយោគ និងការប្រកួតប្រជែងដោយយុត្តិធម៌ តាមរយៈការការពារកម្មសិទ្ធិបញ្ញា។ ចំណែកនៅក្នុងវិស័យវប្បធម៌ វាលើកកម្ពស់ការច្នៃប្រឌិត និងការអភិវឌ្ឍស្នាដៃសិល្បៈ និងវប្បធម៌ ។ តាមរយៈការបង្កើនការយល់ដឹង និងការគោរពកម្មសិទ្ធិបញ្ញា សិក្ខាសាលានេះរួមចំណែកដល់ការអភិវឌ្ឍសង្គមប្រកបដោយចីរភាព និងវឌ្ឍនភាព។
ជាសរុប សិក្ខាសាលាស្តីពី “ការយល់ដឹងអំពីកម្មសិទ្ធិបញ្ញានៅកម្ពុជា” គឺជាព្រឹត្តិការណ៍ដ៏សំខាន់ក្នុងការលើកកម្ពស់ការយល់ដឹង ការគោរព និងការការពារកម្មសិទ្ធិបញ្ញានៅកម្ពុជា ។ សិក្ខាសាលានេះបានផ្ដល់នូវចំណេះដឹងដ៏មានតម្លៃ ជំនាញ និងការលើកទឹកចិត្តដល់អ្នកចូលរួម ជាពិសេសនិស្សិតជំនាញនីតិសាស្ត្រ ។ យើងរំពឹងថាចំណេះដឹង និងបទពិសោធន៍ដែលទទួលបានពីសិក្ខាសាលានេះ នឹងត្រូវបានយកទៅអនុវត្តក្នុងការសិក្សា ការងារ និងជីវភាពរស់នៅប្រចាំថ្ងៃ។ ជាចុងក្រោយ សូមថ្លែងអំណរគុណយ៉ាងជ្រាលជ្រៅចំពោះសមាគមកម្មសិទ្ធិបញ្ញាកម្ពុជា សាកលវិទ្យាល័យបៀលប្រាយ ក្រសួងពាក់ព័ន្ធ វាគ្មិន និងអ្នកចូលរួមទាំងអស់ ដែលបានធ្វើឱ្យសិក្ខាសាលានេះទទួលបានជោគជ័យ ៕
