កំពង់ធំ: ស្នងការដ្ឋាននគរបាលខេត្តកំពង់ធំ បានត្រៀមខ្លួនរួចជាស្រេច រង់ចាំអនុវត្តបទបញ្ជា របស់រាជរដ្ឋាភិបាលនៃព្រះរាជាណាចក្រកម្ពុជា ឯកឧត្តម អភិសន្តិបណ្ឌិតស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ឯកឧត្ដម នួន ផារ័ត្ន អភិបាលខេត្ត សម្រាប់កិច្ចប្រតិបត្តិការ រក្សាសន្តិសុខ សុវត្ថិភាព សណ្តាប់ធ្នាប់ ជូនជាតិមាតុភូមិ។
ការថ្លែងដូច្នេះ នៅពេលដែលលោកឧត្តមសេនីយ៍ទោ ហេង សុផល ស្នងការនគរបាលខេត្ត បានត្រួតពិនិត្យវត្តមានជាក់ស្តែងរបស់មន្ត្រីនគរបាល និងផ្សព្វផ្សាយសភាពការណ៍ ថ្មីៗ នៃការប្រព្រឹត្តទៅ របស់សង្គមជាតិ ដល់កងកម្លាំងចូលរួមប្រមាណជិត៦០០នាក់ កាលពីព្រឹកថ្ងៃចន្ទទី០៩ ខែមិថុនា ឆ្នាំ២០២៥នេះ។
ឧត្តមសេនីយ៍ទោ ហេង សុផល បានក្រើនរំឭកលើការងារមួយចំនួន ដល់កងកម្លាំងរួមមាន÷ ១-សូមឱ្យថ្នាក់ដឹកនាំ នាយការិយាល័យជំនាញ ធ្វើជាគំរូល្អដល់មន្ត្រីក្រោមឱវាទ ក្នុងការដឹកនាំបញ្ជា បំពេញភារកិច្ចប្រចាំថ្ងៃ តាមសេចក្តីរបស់ក្រសួង មហាផ្ទៃ ស្ដីពីការរៀបចំ និងប្រព្រឹត្តទៅ របស់ស្នងការដ្ឋាន នគរបាលរាជធានី-ខេត្ត ។ ២-បន្តអនុវត្ត មោះមុតតាមសេចក្តីណែនាំ របស់ក្រសួងមហាផ្ទៃ ស្តីពីការគ្រប់គ្រង ប្រើប្រាស់ក្របខ័ណ្ឌ មន្រ្តីនគរបាលជាតិ ការគ្រប់គ្រង់ប្រើប្រាស់អាវុធជាតិផ្ទុះ និងមធ្យោបាយ។ ៣-ការងារប្រចាំបញ្ជា ត្រូវផ្លាស់ប្ដូរវេនប្រចាំការ ក្នុងអង្គភាព ២៤ ម៉ោងលើ ២៤ ម៉ោង រង់ចាំអនុវត្ត បទបញ្ជារបស់ថ្នាក់ដឹកនាំ ប្រគល់ជូន និងកិច្ចអន្តរាគមន៍ សង្គ្រោះដល់ប្រជាពលរដ្ឋ នាគ្រាជួយបញ្ហាប្រឈមណាមួយ ដែលអាចកើតមានឡើងជាយថាហេតុ ជាពិសេសត្រៀមខ្លួនរួចជានិច្ច ប្រឆាំងដាច់ខាតចំពោះ ឧបាយកល ក្រុមឧទ្ទាមប្រឆាំងក្រៅច្បាប់មួយក្ដាប់តូច ដែលមានបំណងបង្ករចលាចលសន្តិសុខជាតិ ក្នុងនាមកងកម្លាំង ប្រដាប់អាវុធការពារ ដាច់ខាត ជាតិ សាសនា ព្រះមហាក្សត្រ និងការពារដាច់ខាត រាជរដ្ឋាភិបាលស្របច្បាប់ ដែលចេញពីការបោះឆ្នោត ហើយការពារ ឱ្យបានសន្តិភាព របស់ព្រះរាជាណាចក្រកម្ពុជា។
ឆ្លៀតក្នុងឱកាសនោះលោកឧត្តមសេនីយ៍ទោ ហេង សុផល ស្នងការនគរបាលខេត្ត បានអំពាវនាវដល់ប្រជាពលរដ្ឋ ធ្វើយ៉ាងណាកុំឱ្យចាញ់ល្បិចកល ពួកជ្រុលនិយមមួយចំនួន ដែលតែងតែបង្កើតពត៌មានមិនពិត ធ្វើយ៉ាងណាសំដៅ បង្កភាពអសន្តិសុខ តាមរូបភាពផ្សេង ដើម្បីបំផ្លេចបំផ្លាញភាព សុខដុមរមនា របស់ប្រជាពលរដ្ឋ ដែលកំពុងរស់នៅប្រកប ដោយភាពសុខសាន្ត ៕
ដោយសំនៀង
