ថៃ៖ ប្រទេសថៃបានបង្កើនការឆ្លើយតបយ៉ាងខ្លាំងចំពោះ ឧបទ្ទវហេតុគ្រាប់មីននៅតាមព្រំដែនជាមួយកម្ពុជា ដោយបានប្រកាសដកហូតឯកអគ្គរដ្ឋទូតរបស់ខ្លួនពីទីក្រុងភ្នំពេញ និងបណ្តេញឯកអគ្គរដ្ឋទូតកម្ពុជាប្រចាំទីក្រុងបាងកក។
វិធានការនេះត្រូវបានបញ្ជាក់ ដោយនាយករដ្ឋមន្ត្រីស្តីទី លោក ភុំថាំ វេចាយ៉ាឆៃ ដែលបង្ហាញពីការធ្លាក់ចុះយ៉ាងធ្ងន់ធ្ងរនៃទំនាក់ទំនងការទូត រវាងប្រទេសជិតខាងអាស៊ីអាគ្នេយ៍ទាំងពីរ។
ការសម្រេចចិត្តនេះកើតឡើងបន្ទាប់ពីទាហានថៃម្នាក់ទៀត ពលបាលឯក ពិចិតឆៃ ប៊ុនកុរ៉ាត បានរងរបួសធ្ងន់ធ្ងរ ដោយបាត់បង់ជើងខាងស្តាំ បន្ទាប់ពីជាន់គ្រាប់មីននៅតំបន់ហួយបុនដែលមានជម្លោះ ស្ថិតនៅក្នុងខេត្តឧបលរាជធានី។ ឧបទ្ទវហេតុនេះបានកើតឡើងនៅម៉ោងប្រមាណ ៤:៥៥ ល្ងាច ដោយទាហានរងរបួសត្រូវបានជម្លៀសចេញក្នុងរយៈពេលជាង ២០ នាទីក្រោយមក។
លោក ភុំថាំ ដែលនាយករដ្ឋមន្ត្រីស្តីទី បានថ្លែងថា ព័ត៌មានស៊ើបការណ៍ពីក្រសួងការពារជាតិ ដែលបញ្ជូនដោយអនុរដ្ឋមន្ត្រីការពារជាតិ ឧត្តមសេនីយ៍ ណាតថាផុល ណាក់ផានិច បានបញ្ជាក់ថា កងឯកភាពល្បាតបានជាន់គ្រាប់មីនដែលទើបត្រូវបានដាក់ថ្មី៕
