ភ្នំពពេញ៖ សម្ដេចតេជោ ហ៊ុន សែន ប្រធានព្រឹទ្ធសភា នៃកម្ពុជា បានលើកឡើងថា សម្ដេចនឹងអង្គុយតាមដានព្រឹត្តិការណ៍តាមព្រំដែន កម្ពុជា-ថៃ រហូតដល់សភាពការណ៍ វិលមករកភាពប្រក្រតីវិញ ។
បំណងប្រាថ្នាពិតប្រាកដ របស់ប្រជាជនកម្ពុជា គឺសន្តិភាព ហើយសម្ដេចក៏ជឿជាក់ថា ប្រជាជនថៃក៏ចង់បានសន្តិភាពដូចគ្នាដែរ។
តាមរយៈបណ្ដាញសង្គម ហ្វេសប៊ុក នៅរសៀលថ្ងៃទី៣០ ខែកក្កដា ឆ្នាំ២០២៥ សម្ដេចតេជោ ហ៊ុន សែន បានអោយដឹងដា សម្ដេចបន្តតាមដាន ការអនុវត្តកិច្ចព្រមព្រៀង ឈប់បាញ់សម្រាប់ថ្ងៃទី២ ។ សូមកោតសរសើរកងកម្លាំងប្រដាប់អាវុធ គ្រប់ប្រភេទរបស់កម្ពុជា ដែលគោរពអនុវត្តកិច្ចព្រមព្រៀង ឈប់បាញ់បានយ៉ាងល្អ ។
សម្ដេចអរគុណចំពោះអនុព័ន្ធយោធា នៃបណ្តាប្រទេសដែលបានអញ្ជើញ ទៅពិនិត្យផ្ទាល់ដល់ព្រំដែនកម្ពុជា-ថៃ ក្នុងទឹកដីកម្ពុជា។
សម្ដេចអរគុណផងដែរ ដល់ក្រុមអ្នកយកព័ត៌មាន នៃទូរទស្សន៍សិង្ហបុរីCNA ដែលចុះទៅយកព័ត៌មាន នៅខេត្តជាប់ព្រំដែនដោយផ្ទាល់។
សម្ដេចបញ្ជាក់ថា បំណងប្រាថ្នាពិតប្រាកដ របស់ប្រជាជនកម្ពុជា គឺសន្តិភាពហើយខ្ញុំក៏ជឿជាក់ថា ប្រជាជនថៃក៏ចង់បានសន្តិភាពដូចគ្នាដែរ។
សម្ដេចថា នឹងអង្គុយនៅទីនេះ រហូតដល់សភាពការណ៍ វិលមករកភាពប្រក្រតីវិញ។សម្ដេចសង្ឃឹមថា សម្ដេចនឹងមិនមានជំងឺនិងគ្មានសិទ្ធិឈឺ ក្នុងពេលដែលជាតិនិងប្រជាជនកម្ពុជា កំពុងជួបការលំបាក ៕
