ចាប់ខ្លួនមន្រ្តី គណបក្សកម្លាំងជាតិ មិនមែនជាការគំរាម ផ្នែកនយោបាយ
ភ្នំពេញ ៖ អ្នកនាំពាក្យ នៃស្នងការដ្ឋាន នគរបាលរាជធានីភ្នំពេញ បានច្រានចោល ចំពោះការចោទប្រកាន់ របស់គណបក្សកម្លាំងជាតិដែលចោទថា ការឃាត់ខ្លួនជនសង្ស័យឈ្មោះ អៀម រ៉ាវុទ្ធ អនុប្រធានប្រតិបត្តិខណ្ឌពោធិ៍សែនជ័យ គណបក្សកម្លាំងជាតិ ជាការគំរាមកំហែងផ្នែកនយោបាយ ។
តាមរយៈសេចក្តីប្រកាសព័ត៌មាន អ្នកនាំពាក្យស្នងការភ្នំពេញបានឲ្យដឹងថា ការចាប់ខ្លួនពាក់ព័ន្ធនឹងបទល្មើសប្រមាថចំពោះអង្គព្រះមហាក្សត្រ ។ ចំពោះការចោទប្រកាន់នេះ មិនផ្អែកលើអង្គហេតុ និងអង្គច្បាប់ឲ្យបានត្រឹមត្រូវនោះឡើយ ព្រោះតាមចម្លើយសារភាព និងប្រមូលបានភស្តុតាង ជនសង្ស័យពិតជាបានប្រើប្រាស់បណ្តាញសង្គម ប្រព្រឹត្តសកម្មភាពសរសេរខ្លឹមសារប្រមាថ ចំពោះអង្គព្រះមហាក្សត្រ ផ្ទុយនឹងច្បាប់រដ្ឋធម្មនុញ្ញកម្ពុជា បង្កឲ្យប៉ះពាល់ដល់ព្រះកិត្តិយស ព្រះមហាក្សត្រយ៉ាងធ្ងន់ធ្ងរ ។
ការឃាត់ខ្លួនជនសង្ស័យ សមត្ថកិច្ចអនុវត្តអង្គហេតុ និងអង្គច្បាប់នៃការប្រព្រឹត្តបទល្មើស ដែលមានចែងក្នុងក្រមព្រហ្មទណ្ឌ ។
ជនសង្ស័យឈ្មោះ អៀម រ៉ាវុទ្ធ ត្រូវបានសមត្ថកិច្ចចាប់ឃាត់ខ្លួននៅថ្ងៃទី១៥ ខែសីហា នៅចំណុច ភូមិព្រៃព្រីង សង្កាត់ចោមចៅទី៣ ខណ្ឌពោធិ៍សែនជ័យ ៕
