កម្ពុជាបដិសេធ យ៉ាងម៉ឺងម៉ាត់ ចំពោះការចោទប្រកាន់របស់ថៃថា កម្ពុជាប្រើពលរដ្ឋខ្មែរ ធ្វើជាខែល
ភ្នំពេញ ៖ លោក ជុំ សុន្ទរី អ្នកនាំពាក្យក្រសួងការបរទេសកម្ពុជា បានលើកឡើងថា កម្ពុជាបដិសេធ យ៉ាងម៉ឺងម៉ាត់ ចំពោះការចោទប្រកាន់របស់ថៃ ដែលថា កម្ពុជាប្រើប្រាស់ប្រជាពលរដ្ឋខ្មែរស៊ីវិលធ្វើជាខែល ខណៈពលរដ្ឋខ្មែរទាំងនោះ បានរស់នៅទីនោះតាំងពីយូរលង់មកហើយ។
លោកបន្តថា ពលរដ្ឋកម្ពុជា គឺជាជនរងគ្រោះក្នុងសកម្មភាពយោធាថៃជាឯកតោភាគី រួមមានទាំងការដាក់រាយលួសបន្លា និងរបាំងដែលរារាំងមិនឲ្យពួកគាត់ ចូលទៅកាន់លំនៅដ្ឋាននិងកសិដ្ឋានរបស់ពួកគាត់។ នេះជាប្រសាសន៍របស់លោក ជុំ សុន្ទរី ក្នុងសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅល្ងាចថ្ងៃទី២៨ ខែសីហា ។
ការលើកឡើងរបស់អ្នកនាំពាក្យក្រសួងការបរទេស នេះ បន្ទាប់ពីកងកម្លាំងយោធាថៃបានព្យាយាមរាយបន្លាលួសនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលទល់មុខភូមិសាស្ត្រភូមិ Nong Chan ស្រុក Khok Sung ខេត្តស្រះកែវ ប្រទេសថៃ ក៏ប៉ុន្តែត្រូវបានប្រជាពលរដ្ឋ និងសមត្ថកិច្ចនៅភូមិជោគជ័យធ្វើការទប់ស្កាត់យ៉ាងខ្លាំងទើបកងកម្លាំងរបស់ថៃយកបន្លាលួសនោះត្រឡប់ទៅវិញកាលពីថ្ងៃ២៥ សីហា៕
