ភ្នំពេញ ៖ អភិសន្តិបណ្ឌិត ស សុខា ឧបនាយរដ្ឋមន្រ្តី រដ្ឋមន្រ្តីក្រសួងមហាផ្ទៃ បានចេញផ្សាយសំណេរជាអត្ថបទមួយថា គិតត្រឹមថ្ងៃទី២៩ ខែសីហា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត ចូលកាច់ចង្កូតមាគ៌ាកម្ពុជា ក្នុងឋានៈជានាយករដ្ឋមន្ត្រី នៃរាជរដ្ឋាភិបាល នីតិកាលទី៧ នៃរដ្ឋសភា បានរយៈពេល២ឆ្នាំ ៧ថ្ងៃហើយបាន ធ្វើឲ្យមជ្ឈដ្ឋានអន្តរជាតិ ទទួលស្គាល់ពីភាពចាស់ទុំ នៃរាជរដ្ឋាភិបាលបន្តវេន ។
បើតាមលោកបណ្ឌិត ស សុខាដដែល កម្ពុជាមានក្ដីស្រមៃ ហើយបានគូសវាស និងអនុវត្តយ៉ាងសកម្ម ដើម្បីខិតខំសម្រេច ឲ្យបានភាពជាប្រទេសមានប្រាក់ចំណូលខ្ពស់កម្រិត មធ្យមនៅឆ្នាំ២០៣០ និងប្រាក់ចំណូល ខ្ពស់នៅឆ្នាំ២០៥០។ សន្តិភាព ជាបុរេលក្ខខណ្ឌដ៏ចាំបាច់បំផុត សម្រាប់ដំណើរទៅមុខឥតឈប់ឈរនៃជាតិ។ ប៉ុន្តែជាងមួយខែមកនេះ ថៃដែលជាប្រទេសក្បែរខាង បានព្យាយាមបំផ្លាញ ដើម្បីសម្រេចមហិច្ឆតាឈ្លានពានទឹកដី ផ្ទុយពីកិច្ចព្រមព្រៀងទ្វេភាគី និងច្បាប់អន្តរជាតិ។
ឧបនាយរដ្ឋមន្រ្តី ស សុខា បន្តថា ការថែរក្សាសន្តិភាព និងការពារបូរណភាពទឹកដី អធិបតេយ្យភាពជាតិ បានក្លាយជាបន្ទុកទទួលខុសត្រូវអាទិភាពបំផុតរបស់សម្ដេចធិបតី និងក៏ជាបន្ទុកដ៏ធំធេងបំផុតរបស់គណបក្សប្រជាជនកម្ពុជា ក្រោមការដឹកនាំ របស់សម្ដេចតេជោ ហ៊ុន សែន ដែលជាប្រធានគណបក្ស ទទួលបានសំឡេងបោះឆ្នោតគាំទ្រ ច្រើនលើសលប់ពីប្រជាពលរដ្ឋច្រើនជាងបក្សណាទាំងអស់ ក្នុងប្រវត្តិសាស្រ្តជាតិ។ ក្នុងកាលៈទេសៈនេះ នយោបាយដឹកនាំ និងសកម្មភាពរបស់សម្ដេចធិបតី របស់ថ្នាក់ដឹកនាំរាជរដ្ឋាភិបាល និងដោយឡែកថ្នាក់ដឹកនាំគណបក្សប្រជាជនកម្ពុជា ដែលមានសម្ដេចតេជោ ជាប្រមុខ បានធ្វើឲ្យប្រជាជន ទាំងក្នុង និងក្រៅប្រទេស មានភាពកក់ក្ដៅ និងប្រកបដោយទំនុក ចិត្តខ្ពស់បំផុត ។
ពលរដ្ឋមានភាពកក់ក្ដៅ និងទំនុកចិត្ត! ក៏ព្រោះតែទាំងសម្ដេចធិបតី ហ៊ុន ម៉ាណែត និងថ្នាក់ដឹកនាំគណបក្សប្រជាជនកម្ពុជា បានឆ្លើយតបប្រកបដោយភាពអង់អាច និងមុតស្រួចចំពោះទង្វើឈ្លានពានរបស់ថៃ ទាំងតាមមធ្យោបាយយោធា និងការទូត ជាពិសេសការបង្រួបបង្រួម ស្មារតីប្រជាជន ដើម្បីស្វែងរកដំណោះស្រាយប្រកបដោយសន្តិភាព ឈរលើសកម្មភាពប្រកប ដោយភាពថ្លៃថ្នូរ និងកិត្តិយសលើឆាកអន្តរជាតិ។
លោកបញ្ជាក់ថា “សច្ចធម៌ ការដឹកនាំរបស់រាជរដ្ឋាភិបាល និងឥរិយាបថដ៏ល្អរបស់ប្រជាជនកម្ពុជា ក្នុងកាលៈទេសៈនេះ បានធ្វើឲ្យមជ្ឈដ្ឋានអន្តរជាតិ ទទួលស្គាល់ពីភាពចាស់ទុំ នៃរាជរដ្ឋាភិបាលបន្តវេន និងឥរិយាបថប្រកបដោយ សន្តិភាពរបស់ប្រជាជនកម្ពុជា”៕
