ក្រសួងមហាផ្ទៃ ៖ មិនទុកឱ្យពលរដ្ឋខ្មែរណាម្នាក់ គ្មានឯកសារបញ្ជាក់ អត្តសញ្ញាណប្រើប្រាស់ឡើយ
ភ្នំពេញ ៖ លោកឧត្តមសេនីយ៍ឯក តុប នេត អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ បានដាក់ចេញនូវទិសដៅដល់អាជ្ញាធរពាក់ព័ន្ធទាំងអស់ មិនត្រូវទុកឱ្យប្រជាពលរដ្ឋខ្មែរណាម្នាក់ គ្មានឯកសារបញ្ជាក់អត្តសញ្ញាណប្រើប្រាស់ឡើយ ឱ្យតែប្រជាពលរដ្ឋខ្មែរពិតប្រាកដ។
ក្រោយបញ្ចប់កិច្ចប្រជុំផ្សព្វផ្សាយសេចក្ដីណែនាំ ស្តីពីការជំរុញផ្តល់ឯកសារ បញ្ជាក់អត្តសញ្ញាណជូនប្រជាពលរដ្ឋខ្មែរ ដែលទើបវិលត្រលប់មកពីប្រទេសថៃ និងប្រជាពលរដ្ឋខ្មែរដែលពុំទាន់មានឯកសារគ្រប់គ្រាន់ ជាមួយរដ្ឋបាលថ្នាក់ក្រោមជាតិ នាថ្ងៃទី២៩ សីហា នេះ លោកឧត្តមសេនីយ៍ឯក តុប នេត បានថ្លែងប្រាប់អ្នកសារព័ត៌មានថា លោក អំពាវនាវដល់អាជ្ញាធរ ពាក់ព័ន្ធទាំងអស់ ត្រូវយកចិត្តទុកដាក់ជំរុញផ្ដល់ ឯកសារអត្តសញ្ញាណកម្ម ជូនដល់ប្រជាពលរដ្ឋឱ្យបានគ្រប់ៗគ្នា ។
លោកឧត្តមសេនីយ៍ឯក អគ្គនាយក គូសបញ្ជាក់ថា «យើងកំណត់ជាគោលដៅថា មិនអាចឲ្យពលរដ្ឋណាម្នាក់មិនមានឯកសារ អត្តសញ្ញាណសម្រាប់ប្រើប្រាស់នោះទេ ឲ្យតែប្រជាពលរដ្ឋខ្មែរពិតប្រាកដ»។
នាឱកាសនោះដែរ លោកឧត្តមសេនីយ៍ឯក អគ្គនាយក ក៏បានជំរុញឱ្យមន្រ្តីជំនាញ ដែលពាក់ព័ន្ធទាំងអស់ត្រូវប្រឹងប្រែងផ្ដល់ឯកសារ ជូនដល់ប្រជាពលរដ្ឋខ្មែរដែលទើបវិលត្រឡប់មកពីប្រទសថៃ ពុំទាន់មានឯកសារបញ្ជាក់អត្តសញ្ញាណប្រើប្រាស់នៅឡើយ (ដូចជាសំបុត្រកំណើត សៀវភៅស្នាក់នៅ និងអត្តសញ្ញាណបណ្ណសញ្ជាតិខ្មែរជាដើម) និងមួយចំនួនមានឯកសាអត្តសញ្ញាណបាត់បង់ ខូចខាត ឬអស់សុពលភាព ឬមិនមានឯកសារគ្រប់គ្រាន់ ត្រូវជំរុញផ្តល់ឯកសារអត្តសញ្ញាណតាមរយៈក្រុមការងារកំណត់អត្តសញ្ញាណ ឃុំ សង្កាត់ ជូនប្រជាពលរដ្ឋខ្មែរ ដើម្បីមានភាពងាយស្រួលក្នុងការស្នើសុំប្រើប្រាស់សេវារដ្ឋបាលផ្សេងៗទៀត តាមតម្រូវការចាំបាច់ក្នុងជីវភាពរស់នៅប្រចាំថ្ងៃ៕
