រដ្ឋមន្ត្រីបរិស្ថាន ៖ គម្រោងដាំស្មៅយក្ស រួមចំណែកទប់ស្កាត់ ការកាប់ដើមឈើធម្មជាតិ យកមកធ្វើជាអុសដុត
ភ្នំពេញ ៖ ក្រសួងបរិស្ថាន មានគម្រោងជំរុញការដាំស្មៅយក្ស (Giant King Grass) ដើម្បីពង្រឹងការទប់ស្កាត់ ការកាប់ឈើធម្មជាតិធ្វើអុស រួមចំណែកពង្រីកគម្របបៃតង និងជួយលើកកម្ពស់ជីវភាព សហគមន៍នៅតាមតំបន់ការពារធម្មជាតិ។
លោក អ៊ាង សុផល្លែត រដ្ឋមន្ត្រីក្រសួងបរិស្ថាន ក្នុងជំនួបសម្តែងការគួរសម និងពិភាក្សាការងារជាមួយលោក Adam Henson នាយកផ្នែកអភិរក្សនៃអង្គការ Wild Earth Allies នាថ្ងៃទី២៩ ខែសីហា ឆ្នាំ២០២៥ នៅទីស្តីការក្រសួងបរិស្ថាន បានលើកឡើងពីសារៈសំខាន់នៃការដាំស្មៅយក្ស ដែលឆ្លើយតបនឹងតម្រូវការរបស់ប្រជាពលរដ្ឋក្នុងការចំអិនអាហារ។ ជាមួយគ្នានេះ ស្មៅយក្សមានប្រយោជន៍ ធ្វើជាជីវអុសសម្រាប់ដុត ជំនួសឱ្យអុស ធ្យូង ដែលប្រជាពលរដ្ឋ បានកាប់ឈើធម្មជាតិ។
លោក អ៊ាង សុផល្លែត បានមានប្រសាសន៍ថា ការដាំស្មៅយក្ស នឹងជួយចូលរួមចំណែកកាន់តែប្រសើរក្នុងការទប់ស្កាត់ការកាប់ព្រៃឈើ និងជួយពង្រីកគម្របបៃតងនៅកម្ពុជា បន្ថែមពីកិច្ចខិតខំប្រឹងប្រែងរបស់ក្រសួងបរិស្ថាន ដែលបានដាក់ចេញយុទ្ធនាការ «ពន្លកបៃតង» ជំរុញការបណ្តុះ និងចែកកូនឈើកជូនប្រជាពលរដ្ឋ យកទៅដាំយ៉ាងតិច១លានដើមជារៀងរាល់ឆ្នាំ។
លោក រដ្ឋមន្រ្តី បានថ្លែងបន្ថែមថា រាជរដ្ឋាភិបាលកម្ពុជា បានយកចិត្តទុកដាក់ទៅលើជីវភាព សហគមន៍មូលដ្ឋាន តាមរយៈការផ្តល់ការអភិវឌ្ឍ នៅតាមមូលដ្ឋាន ដើម្បីបង្កើនចំណូល ហើយក៏ជាការរួមចំណែកសំខាន់ដល់ការអភិរក្សព្រៃឈើផងដែរ ។ ពេលនេះសហគមន៍ ក៏មិនចាំបាច់ចូលព្រៃរកអុសទៀតទេ ។ «សហគមន៍តំបន់ការពារធម្មជាតិ អាច ធ្វើការដាំប្រភេទស្មៅយក្ស នឹងអាចរកចំណូលបន្ថែមសម្រាប់គ្រួសារ កាន់តែប្រសើរថែមទៀត។» លោក រដ្ឋមន្រ្តី មានប្រសាសន៍បន្ថែម។
សូមបញ្ជាក់ថា គម្រោងសាល្បងការដាំស្មៅយក្ស នឹងធ្វើឡើងស្របតាមយុទ្ធសាស្រ្តចក្រាវិស័យបរិស្ថាន ដែលមានសសរសត្តម្ភចំនួន៣ រួមមាន ភាពស្អាត ភាពបៃតង និងចីរភាព។ ក្នុងសសរស្តម្ភទី២ «ភាពបៃតង» ដើម្បី ក្រសួងបរិស្ថាន បាននិងកំពុងអនុវត្តយុទ្ធសាស្រ្តបង្កើនគម្របបៃតងនៅកម្ពុជា និងឆ្ពោះទៅសម្រេចចក្ខុវិស័យឆ្នាំ ២០៥០ ដោយធ្វើការពង្រីកចលនាដាំដើមឈើ ពង្រឹងការអនុវត្តច្បាប់ ក្នុងការគ្រប់គ្រងតំបន់ការពារធម្មជាតិ និងការលើកកម្ពស់ជីវភាពសហគមន៍មូលដ្ឋានឱ្យល្អប្រសើរ ៕
