ក្រសួងការងារសហការជាមួយសមាគម TAFTAC ផ្សព្វផ្សាយអំពីលក្ខខណ្ឌសុវត្ថិភាព និងសុខភាពការងារដល់សហគ្រាស និងគ្រឹះស្ថាននៅខេត្តកំពង់ចាម
កំពង់ចាម៖ ក្រសួងការងារ និងបណ្ដុះបណ្ដាលវិជ្ជាជីវៈ សហការជាមួយសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានរៀបចំសិក្ខាសាលាផ្សព្វផ្សាយស្ដីពីលក្ខខណ្ឌសុវត្ថិភាព និងសុខភាពការងារដល់អ្នកគ្រប់គ្រងសហគ្រាស គ្រឹះស្ថាន និងបុគ្គលិកផ្នែកធនធានមនុស្ស រដ្ឋបាលអនុលោមភាព និងគិលានុបដ្ឋានសរុបចំនួន ២៩នាក់ នៅខេត្តកំពង់ចាម នៅថ្ងៃទី២៩ ខែសីហា ឆ្នាំ២០២៥។
លោកវេជ្ជបណ្ឌិត កែវ ធួន អនុប្រធាននាយកដ្ឋានពេទ្យការងារនៃក្រសួងការងារ និងបណ្ដុះបណ្ដាលវិជ្ជាជីវៈ បានដឹកនាំក្រុមការងារចូលរួម និងធ្វើបទបង្ហាញ ដើម្បីការផ្សព្វផ្សាយ ណែនាំ និងបង្កើនការយល់ដឹងដល់សហគ្រាស គ្រឹះស្ថានពីគោលការណ៍សំខាន់ៗដូចជា ច្បាប់ និងបទដ្ឋានគតិយុត្តដែលពាក់ព័ន្ធនឹងសុវត្ថិភាព និងសុខភាពការងារនៅកន្លែងធ្វើការក្នុងសហគ្រាស និងគ្រឹះស្ថាន។
លើសពីនេះ ក្រុមការងារបានពន្យល់ពីនីតិវិធីនៃការត្រួតពិនិត្យបញ្ជីអធិការកិច្ចផ្នែកលក្ខខណ្ឌសុវត្ថិភាព និងសុខភាពការងារ ប្រព័ន្ធគ្រប់គ្រងសុវត្ថិភាព និងសុខភាពការងារ សុវត្ថិភាពគ្រឿងម៉ាស៊ីន មូលដ្ឋានគ្រឹះនៃសុវត្ថិភាពអគ្គិភ័យ និងនីតិវិធីស្នើសុំពិនិត្យកាយសម្បទាផងដែរ។
ក្នុងឱកាសនោះលោកវេជ្ជបណ្ឌិត លី សារុន ប្រធានការិយាល័យនៃនាយកដ្ឋានពេទ្យការងារ បានផ្សព្វផ្សាយនូវព័ត៌មាន និងយុទ្ធនាការមួយចំនួនពាក់ព័ន្ធនឹងវិស័យការងារ និងរបៀបរស់នៅប្រកបដោយសុខុមាលភាពដល់សិក្ខាកាមតាមរយៈការផ្សព្វផ្សាយនូវនីតិវិធីក្នុងការស្វែងរកការងារធ្វើដល់សិក្ខាកាម ដោយបង្ហាញជា (QR Code) និងលេខទូរសព្ទទំនាក់ទំនង ១២៩៧។
លោកវេជ្ជបណ្ឌិត បានបន្តផ្សព្វផ្សាយអំពីកម្មវិធីអប់រំបណ្តុះបណ្តាលបច្ចេកទេស និងវិជ្ជាជីវៈដល់សិក្ខាកាម ការផ្សព្វផ្សាយពីយុទ្ធនាការទប់ស្កាត់ជំងឺអេដស៍ និងគ្រឿងញៀន និងការផ្សព្វផ្សាយពីយុទ្ធនាការទប់ស្កាត់ជំងឺមិនឆ្លង ផលប៉ះពាល់ និងណែនាំឱ្យកាត់បន្ថយការបរិភោគស្ករ អំបិល និងខ្លាញ់លើសកម្រិត៕
