ចង្ក្រានរបស់សិប្បកម្មចង្ក្រានឈ្មោះ(ព្រៃមាន់)ត្រូវក្រុមការងាររដ្ឋាភិបាលចុះជួយខេត្តមណ្ឌលគិរីយកមកជូនពលរដ្ឋ ១៦២៧គ្រួសារនៅក្រុងសែនមនិរម្យ
ចង្ក្រានរបស់សិប្បកម្មចង្ក្រាន(ព្រៃមាន់)ដែលម្ចាស់សិប្បកម្មអះអាងថា វាជួយសន្សំសំចៃថវិកា ព្រោះចង្ក្រានប្រភេទនេះប្រើប្រាស់អុស ឬធ្យូងតិចជាងចង្ក្រានធម្មតានោះ ត្រូវបានក្រុមការងាររាជរដ្ឋាភិបាលដឹកនាំដោយលោកហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការ ចំណុះក្រសួងសាធាណៈការ និងដឹកជញ្ជូន និងជាសមាជិកក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី នាំយកមកជូនប្រជាពលរដ្ឋចំនួន១៦២៧គ្រួសារស្មើរនិង១គ្រួសារចំនួន១ចង្ក្រាន។
ការផ្តល់ជូននេះប្រព្រឹត្តទៅនៅព្រឹកថ្ងៃទី៣១ខែសីហានេះនាបរិវេនសាលាក្រុងសែនមនោរម្យ។
គោលបំណងនៃការផ្តល់ចង្ក្រាន គឺដើម្បីចូលរួមលើកស្ទួយជីវភាពប្រជាពលរដ្ឋ ដែលរស់នៅតំបន់ភូមិភាគឦសាន ។
លោកហេង រត្នពិសិដ្ឋ មានប្រសាសន៍ថា ក្រោមការយកចិត្តទុកដាក់ និងការគាំទ្ររបស់រាជរដ្ឋាភិបាល តែងគិតគូរអំពីសុខុមាលភាព និងជីវភាពរបស់ពលរដ្ឋ បង្កើតបានជាចំណងដ៏រឹងមាំរវាងថ្នាក់ដឹកនាំ និងប្រជាពលរដ្ឋ ។
ដោយមើលឃើញពីតម្រូវការប្រើប្រាស់ប្រចាំថ្ងៃរបស់បងប្អូនប្រជាពលរដ្ឋ ក្រុមហ៊ុន Guangzhou Iceberg Environmental Consulting Service Co.,Ltd តាមរយៈអាជ្ញាធរក្រុងសែនមនោរម្យ បានសហការរៀបចំឲ្យអ្នកភូមិអាចទទួលបានចង្ក្រានប្រើអុសដែលមានគុណភាព ជួយដល់បរិស្ថាន និងកាត់បន្ថយការចំណាយ ។ ការផ្តល់ជូនចង្ក្រានបង្កើនថាមពលពេលនេះ ក៏ជាការរួមចំណែតិចតួចដល់បងប្អូន ក្នុងការប្រើប្រាស់និងជួយសន្សំសំចៃ ថ្លៃចំណាយលើអុសដុតដាំស្លប្រចាំថ្ងៃផងដែរ ។
លោក សាខុម ប៉ូរិន អគ្គលេខាធិការរង និងជាប្រធានបណ្តាញសង្គមស៊ីវិលកម្ពុជា (CCN)និងជាតំណាងក្រុមហ៊ុន Guangzhou Iceberg Environmental Consulting Service Co.,Ltd មានប្រសាសន៍ថា អត្ថប្រយោជន៍នៃការប្រើប្រាស់ចង្ក្រានបង្កើនប្រសិទ្ធភាពថាមពល មិនត្រឹមជួយសន្សំសំចៃថវិកា ចង្ក្រានប្រភេទនេះប្រើប្រាស់អុស ឬធ្យូងតិចជាងចង្ក្រានធម្មតា ថែមទាំងបានជួយដល់ដល់បងប្អូនអ្នកផលិតចង្ក្រានដែលមានឈ្មោះថា ព្រៃមាន់ នេះទៀតផងដែលពួកគាត់ខ្លះកន្លងមកជាអ្នកអត់មានការងារធ្វើ មានជីវភាពក្រីក្រ ។ ចង្ក្រាននេះត្រូវបានរចនាឡើងដើម្បីប្រមូលផ្តុំកម្ដៅបានល្អ ដែលធ្វើឱ្យការចម្អិនអាហារឆាប់ឆ្អិនជាងមុន។ជួយសន្សំសំចៃពេលវេលារបស់ប្រជាពលរដ្ឋក្នុងការរៀបចំម្ហូបអាហារប្រចាំថ្ងៃ។សរុបមក ការចែកជូនចង្ក្រានប្រភេទនេះ មិនត្រឹមតែជាជំនួយបន្តិចបន្តួចប៉ុណ្ណោះទេ ប៉ុន្តែវាក៏ជាការលើកកម្ពស់ជីវភាពរស់នៅ និងការចូលរួមថែរក្សាបរិស្ថាន ក្នុងរយៈពេលវែងផងដែរ។
លោក ហៀក សុផាន អភិបាលក្រុងសែនមនោរម្យ បានថ្លែងអំណរគុណដល់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី និងតំណាង ក្រុមហ៊ុន Guangzhou Iceberg Environmental Consulting Service Co.,Ltd ដែលបានជួយឧបត្ថម្ភគាំទ្រ ដល់បងប្អូនប្រជាពលរដ្ឋក្នុងមូលដ្ឋាន ឲ្យបានប្រើប្រាស់នូវចង្ក្រានដែលជួយទាំងផ្នែកបរិស្ថាន និងជួយកាត់បន្ថយការចំណាយប្រចាំថ្ងៃរ បស់ប្រជាពលរដ្ឋ ជាពិសេសអ្នកដែលមានជីវភាពខ្សត់ខ្សោយ ៕
ដោយ៖ចាន់បុត្រ|មណ្ឌលគិរី|ដើមអម្ពិល
