អភិបាលស្រុកសំឡូត នៅបន្តតាមដាន ពីស្ថានភាពទឹក ក្នុងឃុំសំឡូត និងឃុំតាតោក
យោងតាមរបាយការណ៍របស់លោក សើ សាម៉េត អភិបាលស្រុកសំឡូត បានបញ្ជាក់ថា ចាប់ពីម៉ោងប្រមាណ០២រំលងអាធ្រាតឈានចូលថ្ងៃទី៣១ ខែសីហា ឆ្នាំ២០២៥នេះ ក្នុងស្រុកសំឡូតមានភ្លៀងធ្លាក់យ៉ាងខ្លាំងធ្វើអោយស្ថានភាពទឹកនៅស្ទឹង អូរ ប៉ែកខាងលើក្នុងឃុំសំឡូត និងឃុំតាតោក គឺស្ថានភាពទឹកមានការកើនឡើងពីកម្រិតមធ្យមទៅខ្លាំង ក្នុងនោះឃុំតាតោក ទឹកហូរកាត់ផ្លូវចំនួន០៣កន្លែងមិនអាចធ្វើដំណើរបាន ដោយឡែកឃុំតាសាញ នៅចំណុចភូមិតាសាញត្បូង ទឹកហូរកាត់ផ្លូវតែអាចធ្វើដំណើរឆ្លងកាត់បាន ហើយទឹកនៅស្ទឹងទាំង២នេះបានកំពុងហូរធ្លាក់ខ្លាំងទៅទំនប់ពហុបំណងសេកសក ប៉ុន្តែរហូតមកដល់ពេលនេះទឹកពុំទាន់មានការលិចលង់ដល់ផ្ទះប្រជាពលរដ្ឋឡើយ។
ជាមួយជំនន់ទឹកភ្លៀងខាងលើនេះ ក្នុងនាមអភិបាលស្រុក និងជាប្រធានគណៈបញ្ជាការឯកភាពរដ្ឋបាលស្រុក លោកនៅបន្តតាមដាន និងណែនាំទៅដល់កងកម្លាំងប្រដាប់អាវុធក្នុងស្រុក និងរដ្ឋបាលឃុំទាំង៧ អោយតាមដាននឹងត្រៀមអន្តរាគមភ្លាមៗក្នុងករណីកើតឡើងជាយថាហេតុណាមួយ។
អត្ថបទ៖ សុខ វិច្ឆ័យ / បាត់ដំបង /ដើមអម្ពិល
រូបភាព៖ រដ្ឋបាលស្រុកសំឡូត
