ក្រសួងទេសចរណ៍ ដំណើរការសន្និបាត បូកសរុបលទ្ធផលការងារ វិស័យទេសចរណ៍ ឆ្នាំ២០២៥ និងលើកទិសដៅ ការងារ ឆ្នាំ២០២៦
ភ្នំពេញ ៖ ក្រសួងទេសចរណ៍ នាថ្ងៃទី៣ ខែកុម្ភៈ ឆ្នាំ២០២៦នេះ បានដំណើរការបើកសន្និបាត បូកសរុបលទ្ធផលការងារ វិស័យទេសចរណ៍ឆ្នាំ២០២៥ និងលើកទិសដៅការងារ ឆ្នាំ២០២៦ ដឹកនាំដោយ លោក ហួត ហាក់ រដ្ឋមន្ត្រីក្រសួង ទេសចរណ៍ នៅសណ្ឋាគាររ៉េស៊ីដងសុខាភ្នំពេញ ។
ក្រសួងទេសចរណ៍ ក្រោមការដឹកនាំ របស់ លោក ហួត ហាក់ រដ្ឋមន្ត្រីក្រសួងទេសចរណ៍ បានជំរុញ ការអនុវត្តយុទ្ធសាស្ត្រ បញ្ចកោណ ដំណាក់កាលទី១ ការដាក់ចេញនូវសសរស្តម្ភជាយុទ្ធសាស្ត្រនៃ កិច្ចសហប្រតិបត្តិការទាំង៦ បន្តអនុវត្តផែនការមេអភិវឌ្ឍន៍ទេសចរណ៍ ខេត្តសៀមរាប ឆ្នាំ២០២១-២០៣៥ ផែនការមេអភិវឌ្ឍន៍ទេសចរណ៍ ខេត្តមណ្ឌលគិរី ឆ្នាំ២០២២-២០៣៥ ផែនការមេអភិវឌ្ឍន៍ទេសចរណ៍ ខេត្តកែប ឆ្នាំ២០២៣-២០៣៥ ជំរុញការគ្រប់គ្រង និងអភិវឌ្ឍន៍ឧស្សាហកម្មទេសចរណ៍ ។
ក្នុងនោះមូលដ្ឋាន អាជីវកម្មចំនួន ៩ ១៨១អាជ្ញាបណ្ណ បាននិងកំពុងដំណើរការ ដែលស្រូបទាញកំលាំងពលកម្មប្រមាណ ៥៨ ៦១១នាក់ និងបន្តសហការយ៉ាងជិតស្និទ្ធ ជាមួយក្រសួង ស្ថាប័នពាក់ព័ន្ធ តាមរយៈយន្តការគណៈកម្មាធិការ និងគណៈកម្មការនានា រួមមាន ១) គណៈកម្មាធិការជាតិ គ្រប់គ្រង និងអភិវឌ្ឍន៍ទេសចរណ៍កម្ពុជា ២) គណៈកម្មាធិការជាតិ គ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ៣) គណៈកម្មាធិការជាតិគ្រប់គ្រង និងអភិវឌ្ឍន៍អេកូទេសចរណ៍ ៤) គណៈកម្មការអន្តរក្រសួង ដើម្បីសម្រួលការធ្វើដំណើរ និងដឹកជញ្ជូនទេសចរ និងអ្នកដំណើរនៅតំបន់ច្រកទ្វារ ព្រំដែនអន្តរជាតិ និងច្រកទ្វារអន្តរជាតិទូទាំងប្រទេស។
នៅថ្នាក់ក្រោមជាតិ ក្រសួងទេសចរណ៍ ក៏បានធ្វើការយ៉ាងជិតស្និទ្ធ ជាមួយគណៈកម្មាធិការអភិវឌ្ឍន៍ទេសចរណ៍ រាជធានី ខេត្ត ដែលដើរតួនាទីជាអង្គភាពគ្រប់គ្រង គោលដៅទេសចរណ៍ (DMOs) ដោយបានសហការរៀបចំផែនការ អភិវឌ្ឍទេសចរណ៍រាជធានី ខេត្ត និងបានតាមដាន ត្រួតពិនិត្យ និងវាយតម្លៃជាទៀងទាត់។
លើសពីនេះទៅទៀត ក្រសួងទេសចរណ៍ បានរៀបចំសិក្សា និងបន្តការដាក់ចេញ លិខិតបទដ្ឋានគតិយុត្ត គោលនយោបាយ ផែនការយុទ្ធសាស្ត្រ និងផែនការអភិវឌ្ឍទេសចរណ៍ ដូចជា៖ គោលនយោបាយ ស្តីពីទេសចរណ៍ពិសិដ្ឋ ផែនការអភិវឌ្ឍទេសចរណ៍មូស្លីម ឆ្នាំ២០២៣-២០២៧ ស្របតាមគោលនយោបាយ និងគំនិតផ្តួចផ្តើមជាយុទ្ធសាស្ត្រ ក្រោមទិសស្លោក «ទេសចរណ៍ដើម្បីទាំងអស់គ្នា ទាំងអស់គ្នា ដើម្បីទេសចរណ៍» «ទេសចរណ៍រីកលូតលាស់ ក្នុងសន្តិភាព» និង «បុគ្គលម្នាក់ៗ ជាអ្នកផ្សព្វផ្សាយ ទេសចរណ៍កម្ពុជាម្នាក់!» សំដៅជំរុញកំណើនទេសចរណ៍ ប្រកបដោយចីរភាព បរិយាបន្ន និងការប្រកួតប្រជែង ដើម្បីបង្កើត និងបង្កើនឱកាសមុខរបរ ការងារ ជំរុញកំណើនសេដ្ឋកិច្ច និងការអភិវឌ្ឍសង្គម ៕ ដោយ៖ ដារាត់| ដើមអម្ពិល
