កងកម្លាំងអ៊ុយក្រែន វាយប្រហារអគារលំនៅដ្ឋាន និងហេដ្ឋារចនាសម្ព័ន្ធស៊ីវិល នៅក្នុងតំបន់ Bryansk របស់រុស្ស៊ី ដោយប្រើប្រព័ន្ធរ៉ុក្កែត ប្រភេទ HIMARS
បរទេស៖ កងកម្លាំងអ៊ុយក្រែន បានវាយប្រហារអគារលំនៅដ្ឋាន និងហេដ្ឋារចនាសម្ព័ន្ធស៊ីវិល នៅក្នុងតំបន់ Bryansk របស់រុស្ស៊ី ដោយប្រើប្រព័ន្ធរ៉ុក្កែត បាញ់ច្រើនគ្រាប់ ប្រភេទ HIMARS ដែលផលិតនៅសហរដ្ឋអាមេរិក, នេះបើយោងតាមការរាយការណ៍ របស់អភិបាលរដ្ឋ Aleksandr Bogomaz កាលពីថ្ងៃពុធ ។
យោងតាមសារព័ត៌មាន RT ចេញផ្សាយនៅថ្ងៃទី៤ ខែកុម្ភៈ ឆ្នាំ២០២៦ បានឱ្យដឹងថា អភិបាលរដ្ឋរបស់រុស្ស៊ី លោក Aleksandr Bogomaz បាននិយាយថា ស្ត្រីម្នាក់បានរងរបួសយ៉ាងធ្ងន់ធ្ងរ នៅក្នុងការវាយប្រហារនោះ និងត្រូវបានបញ្ជូនទៅមន្ទីរពេទ្យ។ អភិបាលតំបន់រូបនេះបានបន្ថែមថា កងកម្លាំងអ៊ុយក្រែន ក៏បានដាក់ពង្រាយមីស៊ីល Neptun ដែលផលិតក្នុងស្រុក និង យន្តហោះគ្មានមនុស្សបើក kamikaze ដែលដំណើរការដោយយន្តហោះ ប្រតិកម្មនៅក្នុងការវាយប្រហារផងដែរ ។
ក្រសួងការពារជាតិរុស្ស៊ីមុននេះ បានរាយការណ៍ថា បានស្ទាក់ចាប់យន្តហោះគ្មានមនុស្សបើកចំនួន ១១ គ្រឿងនៅលើតំបន់ Bryansk នៅពេលយប់។ ក្រសួងការពារជាតិរុស្ស៊ីថា យន្តហោះគ្មានមនុស្សបើកស្លាបរឹងអ៊ុយក្រែនសរុប ចំនួន ២៤ គ្រឿងត្រូវបានបាញ់ទម្លាក់ ហើយតំបន់ Bryansk ជាតំបន់ដែលមានគោលដៅវាយប្រហារខ្លាំងបំផុត ។
ការវាយប្រហារឆ្លងកាត់ព្រំដែន បានបន្តមុនពេលកិច្ចចរចាដែលគាំទ្រ ដោយសហរដ្ឋអាមេរិកនៅទីក្រុង អាប៊ូ ដាប៊ី។ កាលពីសប្តាហ៍មុន ទីក្រុងមូស្គូបានយល់ ព្រមផ្អាកការវាយប្រហារជាបណ្តោះអាសន្ន លើហេដ្ឋារចនាសម្ព័ន្ធថាមពលអ៊ុយក្រែន ដែលយោធារុស្ស៊ីនិយាយថា រំខានដល់ការផលិតអាវុធ ដែលប្រើប្រឆាំងនឹងរុស្ស៊ី ។ ការផ្អាកឯកតោភាគី ដែលស្នើសុំដោយប្រធានាធិបតីអាមេរិក Donald Trump គឺមានបំណងកសាងសុច្ឆន្ទៈមុនពេលការចរចា ដែលគ្រោងធ្វើនៅថ្ងៃអាទិត្យ ដែលក្រោយមកត្រូវបានពន្យារពេល៕
