សហជីពថា កម្ពុជា មានលក្ខខណ្ឌការងារល្អប្រសើរ មានសុវត្ថិភាព ប្រាក់ឈ្នួលកាន់តែខ្ពស់ និងមានការគាំពារសង្គមសម្បូរបែប
ភ្នំពេញ៖ សហជីពនៅកម្ពុជា បានបង្ហាញការវាយតម្លៃជាវិជ្ជមាន ចំពោះការកែលម្អ លក្ខខណ្ឌការងារ ដោយអះអាងថា បរិយាកាសការងារ កាន់តែមានភាពល្អប្រសើរឡើង មានសុវត្ថិភាពខ្ពស់ និងមានការផ្តល់អត្ថប្រយោជន៍ច្រើន សម្បូរបែបសម្រាប់បងប្អូនកម្មករនិយោជិត។
លោក សំ សឿន ប្រធានសហភាពពលកម្មជាតិកម្ពុជា មើលឃើញថា បច្ចុប្បន្នេះ ប្រាក់ឈ្នួលរបស់បងប្អូនកម្មករនិយោជិតមានការកើនឡើងជាបន្តបន្ទាប់ ពីមួយឆ្នាំទៅមួយឆ្នាំ ទោះបីមានវិបត្តិសាកលកើងឡើងក៏ដោយ ។ ស្របពេលជាមួយគ្នានេះ ការផ្តល់ការពារសង្គមក៏ត្រូវបានពង្រឹង និងពង្រីកវិសាលភាព គ្របដណ្តប់កាន់តែទូលំទូលាយ ដែលជាកត្តារួមចំណែកយ៉ាងសំខាន់ ក្នុងការលើកកម្ពស់ជីវភាពរស់នៅ និងសុខុមាលភាពរបស់បងប្អូនកម្មករនិយោជិត។
លោកថ្លែងថា៖ «ខ្ញុំមើលឃើញថា លក្ខខណ្ឌការងារនៅកម្ពុជាបច្ចុប្បន្ន កំពុងមានភាពល្អប្រសើរឡើងជាបន្តបន្ទាប់ ដោយមានបរិយាកាសការងារល្អប្រសើរ មានសុវត្ថិភាព ប្រាក់ឈ្នួលកាន់តែខ្ពស់ និងមានការគាំពារសង្គមសម្បូរបែប ដែលជួយលើកកម្ពស់ជីវភាព និងសុខុមាលភាពរបស់កម្មករនិយោជិត»។
ចំណែក លោក គង់ អាទិត្យ ប្រធានសហភាពការងារកម្ពុជា ទទួលស្គាល់ថា បច្ចុប្បន្នកម្ពុជាពិតជាមានភាពល្អប្រសើរឡើងនូវលក្ខខណ្ឌការងារ សុវត្ថិភាពការងារ ប្រាក់ឈ្នួលមានលទ្ធភាពខ្ពស់ និងឡើងរាល់ឆ្នាំ ខណៈការគាំពារសង្គមក៏មានភាពល្អប្រសើរផងដែរ ប៉ុន្តែត្រូវបន្តធ្វើយ៉ាងណាឱ្យមាននិរន្តរភាព។ បើតាមលោក គង់ អាទិត្យ ដើម្បីធានាបាននិរន្តរភាពនៃភាពល្អប្រសើរទាំងនេះ ត្រូវមានការពង្រឹងប្រព័ន្ធភាពធន់ជាចាំបាច់។
លោកថ្លែងថា៖«ការពង្រឹងប្រព័ន្ធភាពធន់ជារឿងសំខាន់បន្តទៀត ដើម្បីយើងធានាឱ្យបន្តប្រសើរ និងមាននិរន្តរភាព»។
យ៉ាងណាក៏ដោយ សហជីពខាងលើក៏បានលើកឡើងដែរថា ទន្ទឹមការធានាបាននូវលក្ខខណ្ឌការងារល្អប្រសើរ មានសុវត្ថិភាព ប្រាក់ឈ្នួលកាន់តែខ្ពស់ និងមានការគាំពារសង្គមសម្បូរបែបមិនចេះរីងស្ងួត ក៏ត្រូវបន្តពង្រឹងការអនុវត្តច្បាប់ និងការត្រួតពិនិត្យលើលក្ខខណ្ឌការងារឱ្យមានប្រសិទ្ធភាពខ្ពស់ ដើម្បីធានាថា ការកែលម្អទាំងនេះមានភាពចីរភាព និងអាចឆ្លើយតបទៅនឹងតម្រូវការពិតប្រាកដរបស់បងប្អូនកម្មករនិយោជិត៕
