រដ្ឋមន្ត្រីមហាផ្ទៃ រំលឹកមន្ត្រីរាជការធ្វើជាគំរូ នៃការអនុវត្តច្បាប់ចរាចរណ៍ ដល់ប្រជាពលរដ្ឋ
កំពត ៖ ក្នុងឱកាសអញ្ជើញជាអធិបតីដ៏ខ្ពង់ខ្ពស់ ទិវាសប្តាហ៍ជាតិសុវត្ថិភាពចរាចរណ៍ផ្លូវគោក លើកទី១៧ ប្រារព្ធឡើងនៅបរិវេណឆ្នេរព្រែកកំពង់បាយ ស្ថិតក្នុងក្រុងកំពត ខេត្តកំពត នាថ្ងៃទី១៥ ខែមិថុនា ឆ្នាំ២០២៦ លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានគូសបញ្ជាក់ថា មន្ត្រីរាជការគឺជាតួអង្គស្នូលសំខាន់បំផុតក្នុងការគោរព និងអនុវត្តច្បាប់ចរាចរណ៍ ដើម្បីធ្វើជាគំរូដល់ពលរដ្ឋអនុវត្តតាម។
ទន្ទឹមនឹងនេះ លោកឧបនាយករដ្ឋមន្ត្រី ក៏បានបង្ហាញការព្រួយបារម្ភយ៉ាងខ្លាំង ដោយសារគ្រោះថ្នាក់ចរាចរណ៍នៅតែបន្តកើតឡើងជារៀងរាល់ថ្ងៃ ដោយពុំទាន់មានសញ្ញាណថមថយគួរឱ្យកត់សម្គាល់នោះទេ។
លោកឧបនាយករដ្ឋមន្ត្រី បានគូសបញ្ជាក់ដោយក្តីព្រួយបារម្ភថា គ្រោះថ្នាក់ចរាចរណ៍ដែលកើតឡើងស្ទើររាល់ថ្ងៃនេះ មិនត្រឹមតែបង្កឱ្យមានការបាត់បង់ជីវិត និងរងរបួសយ៉ាងធ្ងន់ធ្ងរប៉ុណ្ណោះទេ ប៉ុន្តែវាក៏បានបន្សល់ទុកនូវផលវិបាកយ៉ាងធ្ងន់ធ្ងរដល់សេដ្ឋកិច្ចគ្រួសារ និងសង្គមជាតិទាំងមូល។
ប្រមុខក្រសួងមហាផ្ទៃ ក៏បានអំពាវនាវដល់អ្នកប្រើប្រាស់ផ្លូវគ្រប់រូប ក្រុមហ៊ុនដឹកជញ្ជូន និងគ្រប់ភាគីពាក់ព័ន្ធទាំងអស់ រួមគ្នាអនុវត្តតាមអនុសាសន៍ដ៏ថ្លៃថ្លារបស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា ដែលបានអំពាវនាវថា ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍ និងបានផ្តល់អនុសាសន៍សំខាន់ៗចំនួន១១ចំណុច ដល់អ្នកប្រើប្រាស់ផ្លូវទាំងអស់ ដើម្បីតម្កល់ឆន្ទៈក្នុងការគោរពអនុវត្តច្បាប់ ប្រកបដោយ ស្មារតីទទួលខុសត្រូវ។
គួររម្លឹកថា ក្នុងរយៈពេល៥ខែ ដើមឆ្នាំ២០២៦ មូលហេតុចម្បងដែលបណ្តាលឱ្យកើតមានគ្រោះថ្នាក់ទូទាំងប្រទេស រួមមាន ការបើកបរលើសល្បឿនកំណត់ ៤៦% មិនគោរពសិទ្ធិអាទិភាព ២២% មិនប្រកាន់ស្តាំ ១២% វ៉ាជែងមិនប្រុងប្រយ័ត្ន ៧% បត់មិនត្រឹមត្រូវ ៥% បើកបរក្នុងស្ថានភាពស្រវឹង ៤% ល្មើសសញ្ញាចរាចរណ៍ ២% ងងុយដេក ១% និងកត្តាបច្ចេកទេសយានយន្ត ១%៕
