រដ្ឋមន្ត្រី ហេង សួរ ៖ TVET ជាឆ្អឹងខ្នង នៃការអភិវឌ្ឍកម្លាំងពលកម្ម និងជាយានជំរុញសេដ្ឋកិច្ចជាតិ
ភ្នំពេញ ៖ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងថា ការអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET) គឺជាឆ្អឹងខ្នងដ៏សំខាន់ក្នុងការអភិវឌ្ឍកម្លាំងពលកម្ម និងជាយន្តការដែលជួយភ្ជាប់តម្រូវការទីផ្សារការងារ ជាមួយការផ្គត់ផ្គង់ធនធានមនុស្សឱ្យខិតទៅជិតគ្នាបានលឿន និងមានប្រសិទ្ធភាពបំផុត។
ថ្លែងក្នុងពិធីបិទទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៩ នៅមណ្ឌលសន្និបាត និងពិព័រណ៍កោះពេជ្រ នាថ្ងៃទី១៦ ខែមិថុនានេះលោករដ្ឋមន្ត្រី បានមានប្រសាសន៍ថា៖ «TVET គឺជាឆ្អឹងខ្នង ហើយជាកន្លែងដែលរុញតម្រូវការ និងការផ្គត់ផ្គង់កម្លាំងពលកម្មឱ្យខិតទៅជិតគ្នាលឿនបំផុត។ ដូច្នេះ ការរួមគ្នាដើម្បីជំរុញផ្សព្វផ្សាយ និងអភិវឌ្ឍវិស័យ TVET គឺជាកាតព្វកិច្ចមួយសម្រាប់ប្រជាពលរដ្ឋខ្មែរយើងទាំងអស់គ្នា»។
លោកបញ្ជាក់ថា ការជំរុញការផ្សព្វផ្សាយ និងការអភិវឌ្ឍវិស័យ TVET មិនមែនជាការទទួលខុសត្រូវរបស់រាជរដ្ឋាភិបាល ឬគ្រឹះស្ថានបណ្តុះបណ្តាលតែប៉ុណ្ណោះទេ ប៉ុន្តែជាកាតព្វកិច្ចរួមរបស់ប្រជាពលរដ្ឋខ្មែរទាំងអស់គ្នា ដែលចង់ឃើញវិស័យឧស្សាហកម្ម សិប្បកម្ម និងសេវាកម្មក្នុងប្រទេសមានការរីកចម្រើន និងតភ្ជាប់គ្នាកាន់តែរឹងមាំ។
បើតាមលោករដ្ឋមន្ត្រី នៅពេលដែលប្រទេសជាតិមានកម្លាំងពលកម្មជំនាញគ្រប់គ្រាន់ នឹងជួយឱ្យវិស័យឧស្សាហកម្ម សិប្បកម្ម និងសេវាកម្មមានភាពប្រទាក់ក្រឡាគ្នាកាន់តែប្រសើរ បង្កើនផលិតភាព និងបង្កើតតម្លៃបន្ថែមកាន់តែខ្ពស់សម្រាប់សេដ្ឋកិច្ចជាតិ។
ជាមួយគ្នានេះ លោករដ្ឋមន្ត្រីបានចាត់ទុក TVET ថា ជាមធ្យោបាយដ៏សំខាន់ និងជាយានយន្តមួយដែលប្រជាពលរដ្ឋអាចពឹងអាស្រ័យបាន ដើម្បីទទួលបានជំនាញវិជ្ជាជីវៈ ការងារសមរម្យ ប្រាក់ចំណូលល្អប្រសើរ និងឱកាសកែលម្អជីវភាពរស់នៅប្រកបដោយចីរភាព៕
