ខេត្តព្រះវិហារបើកយុទ្ធនាការទ្រង់ទ្រាយធំ «ផ្លូវជាតិគ្មានសំរាមប្លាស្ទិក» ដើម្បីឆ្ពោះទៅរកកម្ពុជាស្អាត និងបៃតង
ខេត្តព្រះវិហារ៖ នាព្រឹកថ្ងៃទី១៩ ខែមិថុនា ឆ្នាំ២០២៦នេះ យុទ្ធនាការសម្អាតផ្លូវជាតិក្រោមប្រធានបទ «ផ្លូវជាតិគ្មានសំរាមប្លាស្ទិក» ត្រូវបានប្រារព្ធឡើងយ៉ាងអធិកអធម នៅបរិវេណសាលាខេត្តព្រះវិហារ។ ពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ លោកស្រី ភុន កេសរ អនុរដ្ឋលេខាធិការក្រសួងបរិស្ថាន និងជាតំណាងដ៏ខ្ពង់ខ្ពស់របស់ លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន រួមជាមួយ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ។
យុទ្ធនាការថ្នាក់ជាតិនេះ ត្រូវបានរៀបចំឡើងក្នុងគោលបំណងយុទ្ធសាស្ត្រសំខាន់ៗចំនួនពីរ៖
១.ដាស់តឿន និងបំផុសស្មារតីសាធារណជន ជំរុញឱ្យប្រជាពលរដ្ឋគ្រប់រូបចូលរួមស្រឡាញ់ និងថែរក្សាអនាម័យបរិស្ថាន តាមរយៈការកាត់បន្ថយការប្រើប្រាស់ប្លាស្ទិក និងការបញ្ឈប់ការបោះចោលកាកសំណល់ពាសវាលពាសកាល។
២.លើកកម្ពស់វិស័យទេសចរណ៍ រួមគ្នាកសាងដងផ្លូវជាតិឱ្យមានភាពបៃតង ស្អាត និងគ្មានការបំពុល ដើម្បីត្រៀមលក្ខណៈស្វាគមន៍យ៉ាងកក់ក្តៅចំពោះភ្ញៀវទេសចរជាតិ និងអន្តរជាតិ ដែលមកកម្សាន្តនៅក្នុងទឹកដីប្រវត្តិសាស្ត្រ និងវប្បធម៌ដ៏សម្បូរបែបនៃខេត្តព្រះវិហារ។
នៅក្នុងឱកាសនោះ គណៈអធិបតីបានសង្កត់ធ្ងន់លើសារដ៏មានអត្ថន័យជ្រាលជ្រៅថា៖ការសម្អាតបរិស្ថាន មិនមែនជាតួនាទីរបស់បុគ្គលណាម្នាក់ឡើយ ប៉ុន្តែវាជាកាតព្វកិច្ច និងជាក្តីស្រឡាញ់របស់យើងទាំងអស់គ្នា ដើម្បីអនាគតមាតុភូមិដ៏ស្រស់បំព្រង។
ព្រឹត្តិការណ៍នេះ គឺជាផ្នែកមួយនៃចលនាជាតិដ៏ធំធេងក្នុងការឆ្ពោះទៅរក «កម្ពុជាស្អាត និងបៃតង» ដែលទាមទារឱ្យមានការចូលរួមចំណែកពីបុគ្គលម្នាក់ៗ ចាប់ពីថ្ងៃនេះតទៅ ដើម្បីនិរន្តរភាពបរិស្ថាន និងការអភិវឌ្ឍប្រកបដោយចីរភាព៕
ដោយ សួន ពិសិតដើមអម្ពិល
