កំពង់ធំ៖ នៅរសៀលថ្ងៃទី ១២ ខែកក្កដា ឆ្នាំ២០២៦ ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំសហការីទៅគោរពវិញ្ញាណក្ខន្ធ លោកវរសេនីយ៍ទោ ឃុន ប៊ុនហួរ មេបញ្ជាការកងរាជអាវុធហត្ថស្រុកបារាយណ៍ ខេត្តកំពង់ធំ ដែលបានទទួលមរណភាពដោយរោគាពាធនៅល្ងាចថ្ងៃទី ១១ ខែកក្កដា ឆ្នាំ២០២៦ កន្លងទៅនេះ នៅមន្ទីរពេទ្យរាជធានីភ្នំពេញ ដែលពិធីនេះប្រព្រឹត្តទៅនៅភូមិសាន់គរ (ខ) ឃុំសាន់គរ ស្រុកកំពង់ស្វាយ ខេត្តកំពង់ធំ ។
ឧត្ដមសេនីយ៍ទោ សោម ស៊ុន និងសហការី បានស្មឹងស្មាធដុតធូប គោរពវិញ្ញាណក្ខន្ធ និងបានសូមបួងសួងដល់វិញ្ញាណក្ខន្ធរបស់លោកវរសេនីយ៍ទោ ឃុន ប៊ុនហួរ បានទៅកាន់សុគតិភពកុំបីឃ្លៀងឃ្លាតឡើយ ហើយនិងបានថ្លែងនូវការសោកស្ដាយអាឡោះអាល័យចំពោះការបាត់បង់លោកវរសេនីយ៍ទោ ឃុន ប៊ុនហួរ ដែលជាធនធានមនុស្សដ៏ល្អ ជាកងយោធពលខេមរភូមិន្ទ ដែលធ្លាប់បានតស៊ូប្រយុទ្ធ ក្នុងសម័យសង្គ្រាមស៊ីវិល រួមចំណែកការពារទប់ស្កាត់ មិនឲ្យរបបប្រល័យពូជសាសន៍ ប៉ុល ពត អៀង សារី វឹលត្រឡប់មកវិញបាន ។ ហើយជាចុងក្រោយនេះ លោកវរសេនីយ៍ទោ ឃុន ប៊ុនហួរ ជាសហការីដ៍ល្អ នៃគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ ដែលបានរួមគ្នាក្នុងការបម្រើអតីតយុទ្ធជននៅក្នុងស្រុកបារាយណ៍ ខេត្តកំពង់ធំ បានយ៉ាងល្អប្រសើរ ។
នៅក្នុងឱកាសសំណេះសំណាលរំលែកទុក្ខដ៍ក្រៀមក្រំជាមួយក្រុមគ្រួសារសពនៅពេលនេះ ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងសហការី បាននាំយកនូវថវិកាមួយចំនួន ចូលរួមចំណែកក្នុងកម្មវិធីបុណ្យសពនេះផងដែរ និងសូមជូនពរដល់ក្រុមគ្រួសារសព លោកវរសេនីយ៍ទោ ឃុន ប៊ុនហួរ សូមទទួលបាននូវសុខភាពល្អ និងពុទ្ធពរទាំងបួនប្រការកុំបីឃ្លៀងឃ្លាតឡើយ៕
ដោយ៖ សំនៀង
