លោក ហួត ហាក់ ចាត់ទុកព្រឹត្តិការណ៍ទេសចរណ៍ កីឡាយានយន្ត នៅកម្ពុជា ជាសកម្មភាពដ៏មានសក្តានុពល ក្នុងការជំរុញទេសចរណ៍
ភ្នំពេញ៖ លោក ហួត ហាក់ ចាត់ទុកការរៀបចំព្រឹត្តិការណ៍ ទេសចរណ៍កីឡាយានយន្ត នៅកម្ពុជា (Overland) លើកទី៣ គឺជាជាសកម្មភាព ដ៏មានសក្តានុពលមួយ ក្នុងការជំរុញទេសចរណ៍កីឡាយានយន្ត និងទេសចរណ៍ផ្សងព្រេង ។
ការលើកឡើងរបស់លោក ហួត ហាក់ រដ្ឋមន្ត្រីក្រសួងទេសចរណ៍ ធ្វើឡើងក្នុងឱកាសអនុញ្ញាតឱ្យក្រុមការងារ CPG Overland ដឹកនាំដោយលោក ហួរ ច័ន្ទវឌ្ឍនៈ ដែលជាប្រធានក្រុមការងារ Caravan Trip និងសហការី ចូលជួបសម្តែងការគួរសម ពិភាក្សាការងារ កាលពីថ្ងៃទី១៣ ខែកក្កដា ឆ្នាំ២០២៦ ដើម្បីរាយការណ៍អំពីគម្រោងរៀបចំព្រឹត្តិការណ៍ Overland លើកទី៣ ដែលគ្រោងនឹងប្រព្រឹត្តទៅនាពេលខាងមុខ ។
ក្នុងឱកាសនោះ លោករដ្ឋមន្ត្រី បានសម្តែងការគាំទ្រ ចំពោះគម្រោងរៀបចំព្រឹត្តិការណ៍នេះ ដោយចាត់ទុកថា ជាសកម្មភាពដ៏មានសក្តានុពល ក្នុងការជំរុញទេសចរណ៍កីឡាយានយន្ត និងទេសចរណ៍ផ្សងព្រេង ព្រមទាំងរួមចំណែកធ្វើពិពិធកម្ម ផលិតផលទេសចរណ៍កម្ពុជា ឱ្យកាន់តែសម្បូរបែប និងទាក់ទាញ។
ព្រឹត្តិការណ៍នេះ នឹងរួមចំណែកផ្សព្វផ្សាយគោលដៅទេសចរណ៍ថ្មីៗ តំបន់ធម្មជាតិ និងសហគមន៍ទេសចរណ៍ទៅកាន់សាធារណជន ឱ្យបានកាន់តែទូលំទូលាយ ព្រមទាំងបង្កើតចរន្តភ្ញៀវទេសចរក្នុងស្រុក ជំរុញការប្រើប្រាស់សេវាកម្មស្នាក់នៅ ម្ហូបអាហារ ការដឹកជញ្ជូន និងសេវាកម្មទេសចរណ៍ផ្សេងៗ ដែលនឹងជួយបង្កើនប្រាក់ចំណូល និងលើកកម្ពស់ជីវភាពប្រជាពលរដ្ឋនៅតាមមូលដ្ឋាន។
ជាមួយគ្នានេះលោករដ្ឋមន្ត្រី បានលើកទឹកចិត្តឱ្យក្រុមការងារយកចិត្តទុកដាក់ រៀបចំព្រឹត្តិការណ៍ប្រកបដោយគុណភាព សុវត្ថិភាព និងការទទួលខុសត្រូវខ្ពស់ ដោយផ្តោតសំខាន់លើការការពារបរិស្ថាន ការគោរពវប្បធម៌ ប្រពៃណី និងទំនៀមទម្លាប់របស់សហគមន៍មូលដ្ឋាន ព្រមទាំងពង្រឹងកិច្ចសហការជាមួយអាជ្ញាធរ មន្ទីរទេសចរណ៍ វិស័យឯកជន និងសហគមន៍ពាក់ព័ន្ធ។
គួរបញ្ជាក់ថា ក្រុម CPG Overland (Car Club) ធ្លាប់បានរៀបចំព្រឹត្តិការណ៍ឦសាន Overland លើកទី១ និងលើកទី២ នៅខេត្តមណ្ឌលគិរី និងខេត្តរតនគិរី ព្រឹត្តិការណ៍ប្រណាំងរថយន្ត Off-Road អន្តរជាតិ នៅខេត្តព្រះសីហនុ ព្រមទាំងពិព័រណ៍រថយន្ត Off-Road Show 2026 កាលពីពេលថ្មីៗនេះ នៅខេត្តកណ្ដាល។
សូមរំលឹកថាព្រឹត្តិការណ៍ Overland លើកទី៣ ត្រូវបានរំពឹងថា នឹងក្លាយជាផលិតផលទេសចរណ៍ដ៏ទាក់ទាញមួយទៀត សម្រាប់យុវជន អ្នកស្រឡាញ់ធម្មជាតិ និងអ្នកចូលចិត្តដំណើរផ្សងព្រេង ព្រមទាំងរួមចំណែកលើកកម្ពស់កិត្តិនាម និងបង្ហាញពីភាពសម្បូរបែប នៃសក្តានុពលទេសចរណ៍កម្ពុជា។ បន្ថែមលើនេះ លោករដ្ឋមន្ត្រី បានគាំទ្រ និងលើកទឹកចិត្តដល់ក្រុមការងារ CPG Overland ក្នុងការបន្តអភិវឌ្ឍព្រឹត្តិការណ៍ Overland ឱ្យកាន់តែមានគុណភាព ស្តង់ដារ និងទំហំធំជាងមុន ដើម្បីឈានទៅក្លាយជា ព្រឹត្តិការណ៍ទេសចរណ៍កីឡាយានយន្ត ថ្នាក់តំបន់នាពេលអនាគត៕
