លោកអភិបាល ខេត្តឧត្តរមានជ័យ ចុះពិនិត្យស្ថានភាពស្ពាន និងផ្លូវថ្នល់ដែលរង ការខូចខាតដោយសារជំនន់ទឹកភ្លៀង
នៅថ្ងៃទី៣ ខែកញ្ញា ឆ្នាំ២០២៦នេះ លោក មាន ចាន់យ៉ាដា អភិបាលនៃគណៈអភិបាលខេត្តឧត្ដរមានជ័យ បានដឹកនាំក្រុមការងារចុះពិនិត្យដោយផ្ទាល់នូវស្ថានភាពទឹកចំនួន០២ កន្លែងគឺ អាងតាម៉ុក និងស្ពានទួលប្រាសាទ ស្ថិតក្នុងស្រុកអន្លង់វែង ខេត្តឧត្តរមានជ័យ បន្ទាប់ពីមានភ្លៀងធ្លាក់ជាបន្តបន្ទាប់ ធ្វើឲ្យស្ថានភាពកម្ពស់ទឹកហក់ឡើង ដល់កម្រិតដែលត្រូវឱ្យមានការប្រុងប្រយ័ត្ន។
បន្ទាប់ពីបានចុះពិនិត្យជាក់ស្ដែងនូវស្ថានភាពទឹក កត់សម្គាល់ឃើញថា ស្ថានភាពទឹកនៅថ្ងៃនេះ មានការស្រកចុះប្រសើរឡើងវិញហើយ ដោយអាងតាម៉ុកមានកម្ពស់ទឹក ៣.៥៧ ម៉ែត្រ បើប្រៀបទៅនឹងពីម្សិលមិញ មានកម្ពស់ទឹក ៣.៨១ ម៉ែត្រ (ទឹកស្រក ០.២៤ ម) ប៉ុន្តែអាជ្ញាធរខេត្ត និងក្រុមការងារជំនាញនៅតែបន្តប្រុងប្រយ័ត្នខ្ពស់ ដើម្បីត្រៀមលក្ខណៈអន្តរាគមន៍ បានភ្លាមៗជូនប្រជាពលរដ្ឋ ព្រោះស្ថានភាពអាកាសធាតុ ក្នុងរដូវវស្សានេះអាចនឹងមានភ្លៀងធ្លាក់បន្តទៀត។
លោកអភិបាលខេត្ត អំពាវនាវដល់បងប្អូនប្រជាពលរដ្ឋទាំងអស់ សូមបង្កើនស្មារតីប្រុងប្រយ័ត្នឱ្យបានខ្ពស់បំផុត ចំពោះស្ថានភាពអាកាសធាតុនិងកម្ពស់ទឹក ជាពិសេសត្រូវយកចិត្តទុកដាក់លើសុវត្ថិភាពកុមារតូចៗ ព្រមទាំងទុកដាក់សម្ភារៈសំខាន់ៗនៅកន្លែងមានដែលមានសុវត្ថិភាព។
បន្ទាប់ពីបញ្ចប់ភារកិច្ចនៅ ស្រុកអន្លង់វែង ឯកឧត្ដម មាន ចាន់យ៉ាដា រួមទាំងក្រុមការងារ បានបន្តដំណើរចុះត្រួតពិនិត្យ ដោយផ្ទាល់លើស្ថានភាព ស្ពានក្នុងឃុំអូរស្វាយ និង ផ្លូវគ្រួសក្រហមមួយខ្សែស្ថិតក្នុងឃុំបាកអន្លូង នៃភូមិសាស្ត្រស្រុកត្រពាំងប្រាសាទ ដែលបានរងការខូចខាតយ៉ាងដំណំដោយសារទឹកភ្លៀងហូរកាត់ផ្ដាច់។
ការចុះបេសកកម្មផ្ទាល់នេះ គឺដើម្បីពិនិត្យ និងវាយតម្លៃយ៉ាងលម្អិតពីកម្រិតនៃការខូចខាតតួស្ពាន និងកំណាត់ផ្លូវគ្រួសក្រហម ដើម្បីឱ្យក្រុមការងារបច្ចេកទេសរៀបចំផែនការជួសជុលឡើងវិញឱ្យបានឆាប់រហ័ស ធានាដល់ការធ្វើដំណើរប្រកបដោយសុវត្ថិភាព និងសម្រួលដល់ការដឹកជញ្ជូនកសិផល របស់ប្រជាពលរដ្ឋក្នុងមូលដ្ឋានសម្រាប់រដូវប្រមូលផលនាពេលខាងមុខនេះ៕សួនពិសិតដើមអម្ពិល
