លោក អ៊ុំ រាត្រី៖ សាសនា និងប្រពៃណី គឺជា «បេះដូង» យ៉ាងសំខាន់ក្នុងការរួមចំណែក អភិវឌ្ឍសង្គមជាតិ
បន្ទាយមានជ័យ ៖ ឈរលើស្មារតីទទួលខុសត្រូវ និងភាពជាអ្នកដឹកនាំ លោក អ៊ុំ រាត្រី អភិបាលខេត្តបន្ទាយមានជ័យ និងភរិយា បានដឹកនាំក្រុមការងារចុះប្រគល់ទីសេនាសនៈថ្មី និងសម្ភារឧបត្ថម្ភ «ឡាននាគរទេះសាឡី» ជូនដល់វត្តនន្ទសិរិគន្ធារាម ស្ថិតក្នុងស្រុកមង្គលបូរី កាលពីថ្ងៃទី១៥ ខែកញ្ញា ឆ្នាំ២០២៦ ដើម្បីដោះស្រាយបញ្ហាប្រឈម និងបំពេញតម្រូវការជាក់ស្តែងក្នុងការបម្រើ សាសនកិច្ចរបស់ព្រះសង្ឃ។
សកម្មភាពនេះ មិនត្រឹមតែជាការបំពេញ តម្រូវការប្រចាំថ្ងៃរបស់វត្តអារាមនោះទេ ប៉ុន្តែវាជាកញ្ចក់ឆ្លុះបញ្ចាំងយ៉ាងច្បាស់ ពីចក្ខុវិស័យដឹកនាំដ៏ទូលំទូលាយរបស់អាជ្ញាធរខេត្ត ដែលមើលឃើញថា ស្មារតីសាសនា និងប្រពៃណី គឺជា «បេះដូង» មិនអាចខ្វះបាននៃកិច្ចអភិវឌ្ឍសង្គមជាតិ សម្រាប់ប្រយោជន៍សាធារណ: និងប្រជាពលរដ្ឋ។
ទស្សនទាននៃការកសាងសមិទ្ធផលនេះ បានគូសបញ្ជាក់យ៉ាងច្បាស់ថា ការពង្រឹងកិច្ចការ «ពុទ្ធចក្រ» និង «អាណាចក្រ» ឱ្យឈានឡើងព្រមគ្នា គឺជាយុទ្ធសាស្ត្រគន្លឹះ ក្នុងការទ្រទ្រង់សុខដុមនីយកម្មសង្គម និងជំរុញកិច្ចអភិវឌ្ឍមូលដ្ឋាន ឱ្យមានចីរភាពពិតប្រាកដ៕
អត្ថបទ: ប៊ុន សំណាង / ដើមអម្ពិល
