រដ្ឋមន្រ្តីសាធារណការ ៖ ការអនុវត្តច្បាប់ផ្លូវថ្នូល ត្រូវភ្ជាប់ការណែនាំឱ្យបង្កើន ការយល់ដឹង ដល់អ្នកប្រើប្រាស់ផ្លូវ
ភ្នំពេញ ៖ លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងថា ការអនុវត្តច្បាប់ផ្លូវថ្នូល មិនមែនត្រឹមតែការត្រួតពិនិត្យ និងចាត់វិធានការប៉ុណ្ណោះទេ ត្រូវភ្ជាប់ជាមួយការផ្សព្វផ្សាយ ការណែនាំ និងការបង្កើនការយល់ដឹងដល់អ្នកប្រើប្រាស់ផ្លូវ។
ការលើកឡើងរបស់ លោក ប៉េង ពោធិ៍នា នាឱកាសអញ្ជើញជាអធិបតីក្នុងពីធីបើកសិក្ខាសាលាស្តីពីការផ្សព្វផ្សាយច្បាប់ ស្តីពីវិសោធនកម្មច្បាប់ស្តីពីផ្លូវថ្នល់ និងលិខិតបទដ្ឋានគតិយុត្តពាក់ព័ន្ធនឹងការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ នៅថ្ងៃទី២៩ ខែកញ្ញា ឆ្នាំ២០២៦។
លោក រដ្ឋមន្រ្តី បានគូសបញ្ជាក់ថា ការធ្វើវិសោធនកម្មច្បាប់នេះ គឺជាជំហានវិជ្ជមានថ្មីមួយដ៏មានសារៈសំខាន់ក្នុងការលើកកម្ពស់ប្រសិទ្ធភាពនៃការគ្រប់គ្រង អភិវឌ្ឍន៍ និងការពារហេដ្ឋារចនាសម្ព័ន្ធផ្លូវថ្នល់។ តាមរយៈការបង្កើនប្រសិទ្ធភាពនៃការទប់ស្កាត់យានយន្តដឹកជញ្ជូនលើសទម្ងន់កម្រិតកំណត់ និងការកែសម្រួលការពិន័យអន្តរការណ៍ឱ្យកាន់តែតឹងរ៉ឹង ច្បាប់នេះនឹងជួយកាត់បន្ថយចំណាយប្រតិបត្តិការដឹកជញ្ជូន និងឡូជីស្ទិករបស់វិស័យឯកជន ព្រមទាំងដើរតួនាទីយ៉ាងសំខាន់ជាខែលការពារទ្រព្យសម្បត្តិជាតិ និងអាយុជីវិតរបស់ប្រជាពលរដ្ឋនៅលើដងផ្លូវ។
លោក ប៉េង ពោធិ៍នា ក៏បានសង្កត់ធ្ងន់ថា ការអនុវត្តច្បាប់មិនមែនត្រឹមតែការត្រួតពិនិត្យ និងចាត់វិធានការប៉ុណ្ណោះទេ ប៉ុន្តែត្រូវភ្ជាប់ជាមួយការផ្សព្វផ្សាយ ការណែនាំ និងការបង្កើនការយល់ដឹងដល់អ្នកប្រើប្រាស់ផ្លូវ និងអ្នកប្រកបអាជីវកម្មដឹកជញ្ជូនផងដែរ។ លោក បានអំពាវនាវដល់មន្ត្រីអនុវត្តច្បាប់គ្រប់ជាន់ថ្នាក់ឱ្យប្រកាន់ខ្ជាប់នូវគោលការណ៍ច្បាប់ជាមូលដ្ឋាន សុចរិតភាព តម្លាភាព វិជ្ជាជីវៈ និងការទទួលខុសត្រូវ ព្រមទាំងអនុវត្តច្បាប់ដោយស្មើភាព និងមិនលម្អៀង។
ជាមួយគ្នានេះ លោក បានជំរុញឱ្យម្ចាស់ក្រុមហ៊ុនដឹកជញ្ជូន ម្ចាស់យានយន្ត អ្នកបើកបរ និងប្រជាពលរដ្ឋទាំងអស់ ចូលរួមអនុវត្តច្បាប់នេះឱ្យបានត្រឹមត្រូវ និងខ្ជាប់ខ្ជួន ដើម្បីរួមចំណែកដល់ការអភិវឌ្ឍវិស័យហេដ្ឋារចនាសម្ព័ន្ធប្រកបដោយចីរភាព។
លោក រដ្ឋមន្រ្តី បានជំរុញឱ្យអាជ្ញាធរមានសមត្ថកិច្ច និងស្ថាប័នពាក់ព័ន្ធ បន្តបង្កើនកិច្ចសហការ និងសម្របសម្រួលគ្នាឱ្យបានជិតស្និទ្ធ ដើម្បីកែលម្អចំណុចខ្វះខាត និងបញ្ហាប្រឈមដែលបានជួបប្រទះនាពេលកន្លងមក ព្រមទាំងបន្តការដឹកនាំ គ្រប់គ្រង និងចុះអនុវត្តសកម្មភាពទប់ស្កាត់ការដឹកជញ្ជូនលើសទម្ងន់កម្រិតកំណត់ឱ្យបានខ្លាំងក្លាថែមទៀត ដើម្បីធានាបាននូវគុណភាពនៃហេដ្ឋារចនាសម្ព័ន្ធផ្លូវថ្នល់ប្រកបដោយគុណភាព និងអាចប្រើប្រាស់បានយូរអង្វែង ហើយអំពាវនាវដល់ម្ចាស់ក្រុមហ៊ុនដឹកជញ្ជូន ម្ចាស់យានយន្ត អ្នកបើកបរ និងប្រជាពលរដ្ឋទាំងអស់ ចូលរួមអនុវត្តច្បាប់នេះឱ្យបានត្រឹមត្រូវ និងខ្ជាប់ខ្ជួន៕
