សហជីពអំពាវនាវឱ្យកម្មករនិយោជិតខិតខំប្រឹងប្រែងបំពេញការងារបន្ថែមទៀត ដើម្បីរក្សាកំណើនវិនិយោគនៅកម្ពុជា
ភ្នំពេញ៖ មេដឹកនាំសហជីពនៅកម្ពុជា បានអំពាវនាវដល់កម្មករនិយោជិតឱ្យបន្តខិតខំបំពេញការងារ បង្កើនផលិតភាព និងគុណភាពការងារ ព្រមទាំងអភិវឌ្ឍជំនាញវិជ្ជាជីវៈបន្ថែម ដើម្បីរួមចំណែកពង្រឹងសមត្ថភាពវិស័យផលិតកម្ម និងទាក់ទាញការវិនិយោគបន្ថែមនៅកម្ពុជា ដែលនឹងជួយបង្កើតឱកាសការងារកាន់តែច្រើនជូនប្រជាពលរដ្ឋ។
លោក សំ សឿន ប្រធានសហភាពពលកម្មជាតិកម្ពុជាបានលើកឡើងថា ការខិតខំបំពេញការងារឱ្យបានល្អប្រសើរ ការបង្កើនផលិតភាព និងការរក្សាគុណភាពផលិតកម្ម គឺជាកត្តាសំខាន់មួយក្នុងការពង្រឹងទំនុកចិត្តរបស់អ្នកវិនិយោគលើកម្លាំងពលកម្មនៅកម្ពុជា។
លោកបានអំពាវនាវឱ្យកម្មករនិយោជិតបន្តអភិវឌ្ឍជំនាញរបស់ខ្លួន ទាំងតាមរយៈការរៀនសូត្រនៅកន្លែងការងារ និងការចូលរួមវគ្គបណ្តុះបណ្តាលវិជ្ជាជីវៈ ដែលរៀបចំដោយស្ថាប័នពាក់ព័ន្ធ ដើម្បីឱ្យកម្លាំងពលកម្មកម្ពុជាមានជំនាញកាន់តែច្បាស់លាស់ និងឆ្លើយតបនឹងតម្រូវការទីផ្សារការងារ។
លោក សំ សឿនបញ្ជាក់ថា៖«យើងខ្ញុំសូមអំពាវនាវដល់បងប្អូនកម្មករនិយោជិត បន្តខិតខំបំពេញការងាររបស់ខ្លួនឱ្យបានល្អប្រសើរ ដើម្បីបង្កើនផលិតភាព និងគុណភាព ជាពិសេសចូលរួមអភិវឌ្ឍជំនាញបន្ថែមតាមរយៈកន្លែងការងារ និងតាមវិទ្យាស្ថានបណ្ដុះបណ្ដាលវិជ្ជាជីវៈ។ បើយើងមានជំនាញច្បាស់លាស់ វានឹងធ្វើឱ្យផលិតភាពរបស់យើងកាន់តែខ្ពស់ មានស្តង់ដារ និងគុណភាពល្អប្រសើរ ដែលអាចបង្ហាញដល់អ្នកវិនិយោគថា កម្ពុជាមានកម្លាំងពលកម្មគ្រប់គ្រាន់ និងមានជំនាញច្បាស់លាស់»។
ការមានកម្លាំងពលកម្មដែលមានជំនាញ និងផលិតភាពខ្ពស់ នឹងជួយលើកកម្ពស់ភាពទាក់ទាញរបស់កម្ពុជា សម្រាប់ការពង្រីកអាជីវកម្មរបស់អ្នកវិនិយោគ ខណៈការពង្រីករោងចក្រ និងសហគ្រាសអាចនាំមកនូវការបង្កើតឱកាសការងារកាន់តែច្រើនសម្រាប់កម្មករនិយោជិត។ នេះបើតាមការបញ្ជាក់បន្ថែមពីលោក សំ សឿន។
ជាមួយគ្នានេះ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានអំពាវនាវឱ្យកម្មករនិយោជិតចូលរួមពង្រឹងសមត្ថភាពវិស័យកាត់ដេរ តាមរយៈការខិតខំបំពេញការងារ និងកិច្ចសហការល្អជាមួយនិយោជក ដើម្បីរួមចំណែកបង្កើតបរិយាកាសការងារដែលមានស្ថិរភាព និងជួយទាក់ទាញការវិនិយោគបន្ថែម។
លោកបញ្ជាក់ថា៖«ខ្ញុំសូមអំពាវនាវដល់បងប្អូនកម្មករនិយោជិតទាំងអស់ សូមចូលរួមចំណែកក្នុងការពង្រឹងសមត្ថភាពវិស័យកាត់ដេររបស់យើងឱ្យកាន់តែរឹងមាំ តាមរយៈការខិតខំប្រឹងប្រែងបំពេញការងារ និងសហការល្អជាមួយនិយោជក ដើម្បីទាក់ទាញអ្នកវិនិយោគបរទេសបន្ថែម ហើយក៏ជាផ្នែកមួយសំខាន់ក្នុងការបង្កើតឱកាសការងារក្នុងស្រុកឱ្យកាន់តែសម្បូរបែបនាពេលអនាគត»។
មេដឹកនាំសហជីពទាំងពីរ បានសង្កត់ធ្ងន់លើសារៈសំខាន់នៃការចូលរួមរបស់កម្មករនិយោជិតក្នុងការលើកកម្ពស់ផលិតភាព គុណភាព និងជំនាញវិជ្ជាជីវៈ ព្រមទាំងការរក្សាទំនាក់ទំនងការងារល្អរវាងកម្មករ និងនិយោជក ដើម្បីរួមចំណែកដល់ការពង្រឹងវិស័យផលិតកម្ម និងទីផ្សារការងារកម្ពុជាក្នុងរយៈពេលវែង៕
