កម្ពុជា ប្រកាសដាក់ឱ្យអនុវត្ត «កម្មវិធីពន្លឿនសកម្មភាព ទប់ស្កាត់សារធាតុបំពុល កម្រិតខ្ពស់នៅកម្ពុជា»
ភ្នំពេញ ៖ «កម្មវិធីពន្លឿនសកម្មភាព ទប់ស្កាត់សារធាតុបំពុលកម្រិតខ្ពស់នៅកម្ពុជា» (Super Pollutant Accelerator Program) ត្រូវបានប្រកាសដាក់ឱ្យអនុវត្តជាផ្លូវការ នាថ្ងៃទី១៩ ខែតុលា ឆ្នាំ២០២៦ នៅរាជធានីភ្នំពេញ ក្រោមអធិបតីភាព លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ។
លោកស្រី Catalina Etcheverry អ្នកគ្រប់គ្រងកម្មវិធី នៃសម្ព័ន្ធអាកាសធាតុ និងខ្យល់ស្អាត (CCAC) បានឡើងថ្លែងបទអន្តរាគមន៍ ដោយសង្កត់ធ្ងន់លើសារសំខាន់ នៃកម្មវិធី ក្នុងការដោះស្រាយបញ្ហាការបំពុលខ្យល់ និងការបំពុលអាកាសធាតុ នៅកម្ពុជា ជាពិសេស ក្នុងការទប់ស្កាត់ការកើនឡើងនៃសារធាតុពុលក្នុងខ្យល់ ដើម្បីជួយការពារសុខភាពសាធារណៈ និងកាត់បន្ថយផលប៉ះពាល់នៃការប្រែប្រួលអាកាសធាតុ។
ក្នុងឱកាសនេះ លោកបណ្ឌិត អ៊ាង សុផល្លែត បានមានប្រសាសន៍ថា កម្មវិធីពន្លឿនការកាត់បន្ថយសារធាតុបំពុល កម្រិតខ្ពស់នេះ បានរៀបចំឡើងដោយមានលក្ខណៈគ្រប់ជ្រុងជ្រោយ ឆ្លើយតបទៅនឹងអាទិភាពជាតិ និងស្របតាម «យុទ្ធសាស្ត្រចក្រាវិស័យបរិស្ថាន ២០២៣-២០២៨»។
លោក បានថ្លែងថា កម្ពុជាបានបង្ហាញពីជំហរយ៉ាងសកម្ម និងការប្តេជ្ញាចិត្តខ្ពស់ ក្នុងការដោះស្រាយ បញ្ហាការប្រែប្រួលអាកាសធាតុ ការកែលម្អគុណភាពខ្យល់ និងការកាត់បន្ថយសារធាតុបំពុលខ្យល់ កម្រិតខ្ពស់នៅកម្ពុជាដូចជា ឧស្ម័នមេតាន កាបូនខ្មៅ និងសារធាតុហាយដ្រូភ្លុយអរ៉ូកាបូន HFCs ដើម្បីគាំទ្រធ្វើឱ្យប្រសើរឡើងនូវគុណភាពខ្យល់ ទប់ស្កាត់ការប្រែប្រួលអាកាសធាតុ និងការអភិវឌ្ឍប្រកបដោយចីរភាពនៅកម្ពុជា។
លោករដ្ឋមន្រ្តី បានថ្លែងបន្ថែមថា កម្មវិធី ដែលសម្ពោធនាពេលនេះ ជាសមិទ្ធផលថ្មីមួយទៀត ដែលកម្ពុជាត្រូវ បានទទួលស្គាល់ ជាប្រទេសចូលរួមចំណែកសំខាន់ ក្នុងការដោះស្រាយបញ្ហាបរិស្ថានសកល និងទទួលបានការគាំទ្រ លើឆាកអន្តរជាតិ ការប្តេជ្ញាចិត្តយ៉ាងមុតមាំរបស់កម្ពុជា ក្នុងការកាត់បន្ថយ ការបំភាយនៃការបំពុលកម្រិតខ្ពស់ និងពង្រឹងមូលដ្ឋានស្ថាប័ន និងបច្ចេកទេសដែលចាំបាច់ ដើម្បីសម្រេចបាននូវមហិច្ឆតាពន្លឿន ការកាត់បន្ថយសារធាតុបំពុល កម្រិតខ្ពស់នៅកម្ពុជា។
សូមបញ្ជាក់ថា កម្មវិធីពន្លឿនសកម្មភាពទប់ស្កាត់សារធាតុបំពុល កម្រិតខ្ពស់នៅកម្ពុជា គឺលទ្ធផលដ៏ត្រចះត្រចង់ កើតចេញពីកិច្ចខិតខំប្រឹងប្រែងរបស់កម្ពុជា និងការគាំទ្រពីសហគមន៍អន្តរជាតិ ដែលឈានដល់ការ អនុម័តជាផ្លូវការ នៅក្នុងសន្និសីទកំពូលលើកទី៣០ (COP30)ស្តីពីការប្រែប្រួលអាកាសធាតុ នៅទីក្រុង Belém ប្រទេសប្រេស៊ីល ឆ្នាំ២០២៥៕
