កាលពីថ្ងៃទី១៥ ខែឧសភាកន្លងទៅគណបក្សភ្លើងទៀន បានសម្រេចចូលរួមការបោះឆ្នោតក្រុមប្រឹក្សាឃុំ សង្កាត់អាណត្តិទី៥ នាខែមិថុនានេះបន្ទាប់ពីធ្វើសមាជគណបក្សលើកទី២របស់ខ្លួនរួចមក។ ស្របពេលជាមួយគ្នានេះដែរ យោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប គណបក្សភ្លើងទៀន បានដាក់បេក្ខជនជាង ១,៦០០ ឃុំសង្កាត់នៅ២៥ ខេត្តក្រុង ក្នុងចំណោមឃុំសង្កាត់ ១,៦៥២ ដែលចំនួននេះគឺនៅក្រោមតែគណបក្សប្រជាជនកម្ពុជាមួយប៉ុណ្ណោះ។
គណបក្សភ្លើងទៀនដែលបានបង្កើតឡើង និងបោះបង់ចោលដោយលោកសម រង្សីបានចាប់ផ្ដើមធ្វើដំណើរនយោបាយរបស់ខ្លួនឡើងវិញក្រោយធ្វើសមាជគណបក្សលើកទី២ រួចដោយសម្រេចចិត្តចូលរួមបោះឆ្នោតឃុំសង្កាត់អាណត្តិទី៥ នាថ្ងៃទី៥ ខែមិថុនាខាងមុខនេះបន្ទាប់ពីស្ងប់ស្ងាត់អស់រយៈពេលជាច្រើនឆ្នាំ។
ទោះបីជាយ៉ាងណាក៏ដោយលទ្ធភាពនៃការឈរឈ្មោះបោះឆ្នោតឃុំសង្កាត់អាណត្តិទី៥ នេះអាចធ្វើទៅបានដោយសារតែការចូលរួមរបស់អតីតមន្រ្តីនៃគណៈបក្សសង្រ្គោះជាតិដែលជាបក្សមានឈ្មោះមិនល្អរួចទៅហើយ មានរឿងអាស្រូវ និងធ្វើឱ្យប៉ះពាល់ដល់ប្រយោជន៍ជាតិជាច្រើន។ ភាពងងឹត និងស្នាមប្រេះស្រាំទាំងនោះមិនបានទៅណាឆ្ងាយនោះឡើយដោយសារតែ មន្រ្តីទាំងនោះ នៅតែជាមនុស្សដដែរ ហើយពួកគាត់បានផ្សារភ្ជាប់ជាមួយផ្នត់គំនិត និងការគិតទាំងនោះរួចទៅហើយជាក់ស្ដែងបន្ទាប់ពីការបើកឱ្យធ្វើយុទ្ធនាការឃោសនាបោះឆ្នោតផ្លូវការភ្លាមៗនោះគណបក្សប្រឆាំងមួយនេះបានបាត់អស់មួយសង្កាត់ភ្លាមៗ ក្រោយ គ.ជ.ប សម្រេចលុបចោលបេក្ខភាពប្រកួតប្រជែងសង្កាត់ទួលស្វាយព្រៃ១។
គួរបញ្ជាក់ផងដែរថាក្នុងរយៈពេលឃោសនាបោះឆ្នោតប៉ុន្មានថ្ងៃនេះគ.ជ.ប បានទទួលពាក្យបណ្ដឹងប្រមាណជា ៤៥ ករណីដែលបានប្ដឹងបក្សភ្លើងទានអំពីការប្រើពាក្យប្រមាថ និងមើលងាយ។ ការណ៍នេះបានបង្ហាញឱ្យឃើញយ៉ាងច្បាស់នូវទង្វើដ៏អសីលធម៌របស់មន្ត្រី និងដៃជើងរបស់បក្សប្រឆាំងមួយនេះ។ ដូច្នេះហើយគណបក្សភ្លើងទាននៅមានភារៈកិច្ចជាច្រើនទៀតដើម្បីរៀបចំ ដុះខាត់មន្រ្តីរបស់ខ្លួនដើម្បីក្លាយជាបក្សប្រឆាំងមួយដែលអាចចូលរួមប្រឆាំងដោយតម្លាភាព សច្ចភាព និងប្រកបទៅដោយសីលធម៌ជាមនុស្សជាតិ។ ស្របពេលដែលការរៀបចំមិនទាន់រួចរាល់ និងសមស្របនៅឡើយ មានមន្រ្តី និងអតីតមន្រ្តីរបស់ខ្លួនជាច្រើនបានចូលរួមជាមួយបក្សកាន់អំណាចដែលបង្ហាញអំពីការមិនទុកចិត្ត និងការបាត់បង់ទំនុកចិត្តទៅលើបក្ស និងមេដឹកនាំរបស់ខ្លួនដោយមើលមិនឃើញអំពីអនាគតនៃដំណើរជីវិតនយោបាយរបស់ខ្លួន។
ការមើលឃើញអំពីភាពអវិជ្ជមាននេះមិនត្រឹមតែកើតចេញពីមជ្ឈដ្ឋានខាងក្នុងរបស់ខ្លួននោះឡើយ ប៉ុន្តែក៏បានមើលឃើញពីមជ្ឈដ្ឋានខាងក្រៅផងដែរជាក់ស្ដែងលោកសុខ ឥសាន អ្នកនាំពាក្យគណបក្សប្រជាជនកម្ពុជាបានលើកឡើងថា «ភ្លើងទៀនមានសង្ឃឹមរលាយដូចឱវា ដោយសារបានប្រព្រឹត្តល្មើសច្បាប់ និងគោលការណ៍គ.ជ.ប»។
ពាក្យថា ឱវា នេះលោកចង់សម្ដៅដល់គណបក្សសង្រ្គោះជាតិដែលត្រូវបានរំលាយចោលដោយតុលាការកំពូល។ ការលើកឡើងនេះ គឺអាចបណ្ដាលមកពីសកម្មភាពឃោសនារបស់គណបក្សប្រឆាំងមួយនេះហាក់ដូចជាមានលក្ខណៈមិនប្រក្រតី និងធ្វើខុសច្បាប់ដែលបានគំណត់ដូចបានគូសបញ្ជាក់ខាងដើមអញ្ចឹង។
ជាងនេះទៅទៀតលោក សយ សុភាព អគ្គនាយកសារព័ត៌មាន ដើមអម្ពិល និងជាប្រធានសមាគមអ្នកសារព័ត៌មានកម្ពុជា-ចិន ក៏បានលើកឡើងផងដែរថា «គណបក្សភ្លើងទៀន កំពុងដើរចូលជ្រោះ ដោយមិនដឹងខ្លួន»។
ការលើកឡើងខាងលើនេះដោយសារតែមានអ្នកគាំទ្រគណបក្សភ្លើងទានបានយករូបលោកសម រង្សីដែលកំពុងមានទោស និងរស់នៅក្រៅប្រទេសមកប្រើប្រាសក្នុងយុទ្ធនាការនៃការឃោសនាបោះឆ្នោតនេះដោយលោកសយ សុភាពបានបន្ថែមទៀតថា «សម រង្ស៊ី និងកូកនត្រូវបានតុលាការកម្ពុជា កាត់ឱ្យជាប់ទោសរួចហើយ។ ដូច្នេះគាត់និងបក្សពួកគាត់ ប៉ុន្មាននាក់ទៀត ជាទណ្ឌិត ហើយគណបក្សភ្លើងទៀនយកយីហោទណ្ឌិត សម រង្ស៊ី មកប្រើឃោសនា បោះឆ្នោត ឃុំ-សង្កាត់ នាពេលនេះ បានសេចក្តីថា រំលោភច្បាប់បោះឆ្នោត»។
សរុបមកគណបក្សភ្លើងទៀទោះបង្កើតមកច្រើនឆ្នាំហើយក្ដីដោយគ្រាន់តែផ្លាស់ប្ដូរឈ្មោះជាច្រើនលើកប៉ុន្តែពួកគេនាពេលនេះដូចស្ថិតនៅចំណុចចាប់ផ្ដើមសារជាថ្មី និងពោលពេញទៅដោយរឿងអាស្រូវដែលបន្សល់ដោយមេដឹកនាំចាស់ និងអតីតមន្រ្តីខិលខូចរបស់ខ្លួនដោយធ្វើឱ្យពួកគេបានបាត់បង់នូវទំនុកចិត្តពីអ្នកគាំទ្រ និងមជ្ឈដ្ឋានជុំវិញខ្លួន។
រហូតមកទល់ពេលនេះមនុស្សទូទៅនៅមិនទាន់ប្រាកដចិត្តនឹងការអះអាងរបស់មន្រ្តីជាន់ខ្ពស់របស់បក្សនេះនៅឡើយពាក់ព័ន្ធទៅនឹងទំនាក់ទំនងរបស់បក្ស និងលោកសម រង្សីទោះបីជាពួកគេព្យាយាមបដិសេដយ៉ាងណាក្ដី។
បញ្ហាផ្ទៃក្នុង ការបាត់បង់ទំនុកចិត្ត រឿងអាស្រូវដែលមិនទាន់លុបលាងបាន និងប្រជាប្រិយភាពដ៏ខ្លាំងខ្លារបស់បក្សកាន់អំណាច មិនអាចធ្វើឱ្យបក្សប្រឆាំងមួយនេះជាដៃគូរប្រកួតប្រជែងរបស់បក្សកាន់អំណាចបាននោះឡើយ៕
