ញូវយ៉ក៖ លោក Elon Musk បានប្រកាសបញ្ចប់ការស្វែងរកនាយកប្រតិបត្តិបន្ទាប់របស់បណ្ដាញ Twitter ហើយនៅក្នុងការបង្ហោះ នៅលើបណ្ដាញសង្គម Twitter កាលពីថ្ងៃព្រហស្បតិ៍ លោក Elon Musk បានលើកឡើងថា ស្ត្រីដែលមិនបញ្ចេញឈ្មោះ នឹងចូលកាន់តំណែងបន្ដពីលោកក្នុងរយៈពេលប្រហែលប្រាំមួយសប្តាហ៍។
លោក Elon Musk បានលើកឡើងថា លោកនឹងផ្លាស់ប្តូរទៅជាប្រធានប្រតិបត្តិ និងជាប្រធានផ្នែកបច្ចេកវិទ្យា “ត្រួតពិនិត្យផលិតផល សូហ្វវែរ និងស៊ីសូប” នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Aljazeera។
ខណៈពេលដែលលោក Elon Musk មិនបានបញ្ចេញឈ្មោះ អ្នកជំនួសរបស់លោក កាសែត Wall Street Journal ដោយដកស្រង់ពីមនុស្ស ដែលស្គាល់ពីស្ថានភាពនេះកាលពីថ្ងៃព្រហស្បតិ៍ បានរាយការណ៍ថា ប្រធានផ្នែកផ្សាយ ពាណិជ្ជកម្មរបស់ NBCUniversal លោកស្រី Linda Yaccarino កំពុងពិភាក្សា សម្រាប់តួនាទីនេះ។
ការប្រកាសរបស់លោក Elon Musk កើតឡើងបន្ទាប់ពីអ្នកប្រើប្រាស់បណ្ដាញ Twitter កាលពីខែធ្នូ បានបោះឆ្នោតយ៉ាង លើសលប់ឱ្យនាយកប្រតិបត្តិក្រុមហ៊ុន Tesla រូបនេះ ចុះចេញពីតំណែងជាប្រធានបណ្តាញ ប្រព័ន្ធផ្សព្វផ្សាយសង្គម នៅក្នុង ការស្ទង់មតិ ដែលលោកបានធ្វើដោយខ្លួនឯង។
លោក Elon Musk ដែលជាអ្នកដឹកនាំក្រុមហ៊ុនរ៉ុក្កែត SpaceX បានដឹកនាំការផ្លាស់ប្តូរយ៉ាងទូលំទូលាយនៅលើបណ្ដាញ Twitter បន្ទាប់ពីទិញវេទិកានេះក្នុងតម្លៃ ៤៤ពាន់លានដុល្លារកាលពីឆ្នាំមុន រួមទាំងការបញ្ឈប់បុគ្គលិកប្រហែល ៨០ភាគរយ ការបន្ធូរបន្ថយស្តង់ដារសម្របសម្រួល និងចាប់ផ្តើមសេវាកម្មបង់ប្រាក់ហៅថា Twitter Blue ៕
ប្រែសម្រួល ឈូក បូរ៉ា
