បរទេស៖ យោងតាមការចេញផ្សាយរបស់ RT ដែលបានដកស្រង់ព័ត៌មានចេញពីកាសែត Financial Times បានរាយការណ៍ថា ក្រុមហ៊ុន Apple គ្រោងនឹងផ្លាស់ប្តូរសង្វាក់ការផលិតទូរស័ព្ទ iPhone ទាំងអស់ពីប្រទេសចិនទៅកាន់ប្រទេសឥណ្ឌា ក្រោមហេតុផលនៃភាពតានតឹងពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំងដែលកំពុងកើនឡើង។
កាលពីដើមខែនេះ ប្រធានាធិបតីអាមេរិកលោក Donald Trump បានដាក់ពន្ធគយលើប្រទេសជាច្រើន ដោយទំនិញរបស់ចិនប្រឈមនឹងពន្ធខ្ពស់រហូតដល់ ១៤៥ភាគរយផងដែរ។
លោកបានអះអាងថា វិធានការនេះនឹងជួយស្តារផលិតកម្មក្នុងស្រុកឡើងវិញ និងដោះស្រាយសមតុល្យពាណិជ្ជកម្មដែលកំពុងធ្លាក់ចុះ។ ទីក្រុងប៉េកាំងបានឆ្លើយតបដោយការដាក់ពន្ធផ្ទាល់ខ្លួន និងការរឹតបន្តឹងការនាំចេញ។
ទីភ្នាក់ងារគយ និងការពារព្រំដែនសហរដ្ឋអាមេរិកបានបន្តផ្សព្វផ្សាយបញ្ជីនៃអត្ថបទលើកលែង ដែលមានអត្រាត្រឹមតែ ២០ភាគរយដែល ដាច់ដោយឡែក និងរួមបញ្ចូលកុំព្យូទ័រ កុំព្យូទ័រយួរដៃ ស្មាតហ្វូន និងឧបករណ៍បច្ចេកវិទ្យា និងសមាសធាតុផ្សេងទៀត។
គួរឲ្យដឹងដែរថាចំពោះការអត្ថាធិប្បាយលើការសម្រេចចិត្តនេះ សេតវិមានបាននិយាយថា ការលើកលែងនេះគឺចង់ផ្តល់ពេលវេលាគ្រប់គ្រាន់ដល់ក្រុមហ៊ុន ដើម្បីធ្វើមូលដ្ឋានីយកម្មផលិតកម្មរបស់ពួកគេនៅលើដីសហរដ្ឋអាមេរិកប៉ុណ្ណោះ៕
ប្រែសម្រួល៖ ស៊ុនលី
