បរទេស៖ ក្រុមហ៊ុនអ្នកផលិតអាវុធធំបំផុត របស់ប្រទេសអាល្លឺម៉ង់ Rheinmetall កាលពីថ្ងៃអាទិត្យម្សិលមិញនេះ បានធ្វើការអះអាង និងលើកឡើង ថាការបញ្ជូនរថក្រោះ Leopard ទៅកាន់ប្រទេសអ៊ុយក្រែន នៅក្នុងឆ្នាំ២០២៣ គឺជាកិច្ចការងារដែលមិនអាចធ្វើទៅរួច នោះឡើយ។
ក្រុមហ៊ុនដដែលបានបញ្ជាក់ទៀតថា កិច្ចការងារដ៏លំបាកនេះ មិនអាចសម្រេចបានឡើយ ក្នុងឆ្នាំនេះទោះបីជាមានការប្រកាស បើកភ្លើងខៀវ ពីសំណាក់រដ្ឋាភិបាល ទៅហើយក្តីពីព្រោះថា រថក្រោះទាំងនោះ ត្រូវឆ្លងកាត់ដំណាក់កាល រុះរើនិងថែរក្សាជួសជុល ជាមុនសិន។
ថ្លែងបញ្ជាក់ប្រាប់ទៅកាន់ កាសែតក្នុងស្រុក The Bild ក្រុមហ៊ុនក៏បានបង្ហាញដែរថាបច្ចុប្បន្នខ្លួន មានរថក្រោះប្រភេទ Leopard 2 ចំនួនត្រឹមតែ២២គ្រឿង ខណៈដែលរថក្រោះប្រភេទ Leopard 1 មានប្រមាណជា៨៨គ្រឿង ហើយដំណើរការនៃការជួសជុល និងរៀបចំបញ្ចូន ទៅកាន់ប្រទេសផ្សេងនោះ គឺត្រូវការចំណាយ រហូតទៅដល់ រាប់រយលានដុល្លារ។
គួរឲ្យដឹងដែរថារដ្ឋាភិបាល ទីក្រុងគៀវ ជាយូរមកហើយតែងតែ បានប្រកាសទាមទារឲ្យបណ្តាប្រទេសលោកខាងលិច ក្នុងការជួយគាំទ្រនិងផ្គត់ផ្គង់ រថក្រោះជាច្រើនដើម្បី ប្រយុទ្ធប្រឆាំងជាមួយនឹង ប្រទេសរុស្សី៕
ប្រែសម្រួល៖ស៊ុនលី
