ប៉េកាំង៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៧ ខែឧសភា ឆ្នាំ២០២៣ថា ប្រទេសចិន កំពុងបន្តការជំរុញរបស់ខ្លួនសម្រាប់គម្រោងហេដ្ឋារចនាសម្ព័ន្ធដ៏ធំនៅអាស៊ីកណ្តាល ខណៈដែលក្រុងប៉េកាំង មានគោលបំណងបំពេញចន្លោះប្រហោងដែលនៅសេសសល់នៅក្នុងអតីតរដ្ឋសូវៀតដោយរុស្ស៊ី ដែលត្រូវបានជាប់ក្នុងសំណាញ់ពង្រីកទណ្ឌកម្មរបស់លោកខាងលិចជុំវិញសង្គ្រាមនៅអ៊ុយក្រែន ។
នៅអាស៊ីកណ្តាល បានក្លាយជាគន្លឹះនៃគំនិតផ្តួចផ្តើមខ្សែក្រវាត់ និងផ្លូវ ហៅកាត់ថា (BRI) ដែលមានតម្លៃរាប់ពាន់លានដុល្លាររបស់ប្រទេសចិន ដែលជាគម្រោងកំណត់ភូមិសាស្ត្រនយោបាយសម្រាប់ប្រធានាធិបតី ហ្ស៊ី ជិនពីង ។
ប្រទេសប្រហែល១៥០បានទទួលមូលនិធិពីប្រទេសចិន ដើម្បីសាងសង់ផ្លូវថ្នល់ កំពង់ផែ ផ្លូវរថភ្លើង ឬទំនប់វារីអគ្គិសនី ។
ក្រុងប៉េកាំង បានបញ្ជាក់ថា ពាណិជ្ជកម្មជាមួយ កាហ្សាក់ស្ថាន កៀហ្ស៊ីស៊ីស្ថាន តាជីគីស្ថាន តូមិននីស្ថាន និងអ៊ូសបេគីស្ថាន ឈានដល់៧០ពាន់លានដុល្លារនៅក្នុងឆ្នាំ២០២២ ហើយបានពង្រីក២២ភាគរយពី១ឆ្នាំទៅ១ឆ្នាំនៅត្រីមាសទី១ ឆ្នាំ ២០២៣នេះ ។
ក្រុមអ្នកវិភាគបានលើកឡើងថា សង្គ្រាមរបស់រុស្ស៊ី នៅអ៊ុយក្រែនបានផ្លាស់ប្តូរភាពស្វាហាប់បន្ថែមទៀតនៅក្នុងការពេញចិត្តរបស់ក្រុងប៉េកាំង ដោយនាំឱ្យមនុស្សជាច្រើននៅក្នុងតំបន់ចោទសួរអំពីទំនាក់ទំនងដ៏យូរអង្វែងរបស់ពួកគេជាមួយក្រុងម៉ូស្គូ និងស្វែងរកការធានាផ្នែកសេដ្ឋកិច្ច ការទូត និងយុទ្ធសាស្ត្រនៅកន្លែងផ្សេងទៀត ។
លោក Ayjaz Wani សមាជិកម្នាក់នៅមូលនិធិស្រាវជ្រាវ Observer នៅទីក្រុង Mumbai បានប្រាប់ដល់ទីភ្នាក់ងារព័ត៌មាន AFP ថា “បន្ទាប់ពីការឈ្លានពានរបស់រុស្ស៊ី នៅអ៊ុយក្រែន សាធារណរដ្ឋអាស៊ីកណ្តាលបានចាប់ផ្តើមភ័យខ្លាចចំពោះអធិបតេយ្យភាពរបស់ពួកគេ ។
គេបានដឹងថា លោក ហ្ស៊ី នឹងធ្វើជាម្ចាស់ផ្ទះនៃមេដឹកនាំនៃប្រទេសទាំង៥នៅក្នុងទីក្រុង Xi’an ភាគខាងលិចនៅក្នុងសប្តាហ៍នេះសម្រាប់កិច្ចប្រជុំកំពូលមួយ ដែលក្រុងប៉េកាំង បានពិពណ៌នាថា ជា“ព្រឹត្តិការណ៍ដ៏សំខាន់” ៕
ដោយ៖ ម៉ៅ បុប្ផាមករា
