ហ្គាហ្សា ៖ ភាពក្រីក្រនៅក្នុងទឹកដីប៉ាឡេស្ទីនអាចកើនឡើង ៤៥ ភាគរយ ឬប្រហែល ៦៦ម៉ឺននាក់ ប្រសិនបើជម្លោះ រវាងក្រុមសកម្មប្រយុទ្ធហាម៉ាស និងអ៊ីស្រាអែល នៅតែបន្តសម្រាប់ខែទី៣ របស់ខ្លួន នេះបើយោងតាមការព្យាករណ៍ កម្មវិធីអភិវឌ្ឍន៍របស់អង្គការ សហប្រជាជាតិនាពេលថ្មីៗនេះ។
របាយការណ៍របស់ UNDP និងគណៈកម្មការសេដ្ឋកិច្ច និងសង្គមរបស់អង្គការសហប្រជាជាតិ សម្រាប់អាស៊ីខាងលិចបានបង្ហាញថា ខែទី៣ នៃសង្រ្គាមអាចឃើញអត្រា នៃភាពក្រីក្រសរុប នៅក្នុងតំបន់វេសបែង និងហ្គាហ្សាស្ទ្រីប កើនឡើងដល់ ៣៨,៨ភាគរយពី ២៦,៧ ភាគរយនៃចំនួនប្រជាជនប៉ាឡេស្ទីន ដែលមានប្រជាជនសរុប ៥,៥ លាននាក់ ។
ក្នុងសេណារីយ៉ូ បែបនេះ ផលិតផល ក្នុងស្រុកសរុប របស់ប៉ាឡេស្ទីនក៏នឹងធ្លាក់ចុះ ១២,២ ភាគរយ ឬ ២,៥ ពាន់លានដុល្លារដែរ នេះបើយោង តាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
របាយការណ៍ដែលមានចំណងជើងថា “សង្គ្រាមហ្គាហ្សា៖ ផលប៉ះពាល់សេដ្ឋកិច្ចសង្គម ដែលរំពឹងលើរដ្ឋប៉ាឡេស្ទីន” ត្រូវបានចេញផ្សាយនៅដើមខែនេះ បន្ទាប់ពីមានការវាយប្រហារដ៏ភ្ញាក់ផ្អើលកាលពីថ្ងៃទី០៧ ខែតុលា ដោយក្រុមហាម៉ាស លើអ៊ីស្រាអែល ដែលបានឆ្លើយតបនឹងការទម្លាក់គ្រាប់បែកសងសឹកទ្រង់ទ្រាយធំលើតំបន់ហ្គាហ្សា។
ស្ថានភាពមនុស្សធម៌នៅតំបន់ហ្គាហ្សាស្ទ្រីប កាន់តែយ៉ាប់យ៉ឺន ចំពេលមានប្រតិបត្តិការយោធាជើងគោក និងអាកាសដ៏កាចសាហាវ ដែលធ្វើឡើងដោយអ៊ីស្រាអែល។
អ្នកគ្រប់គ្រង UNDP លោក Achim Steiner បានឲ្យដឹង នៅក្នុងរបាយការណ៍ថា “ការវាយតម្លៃនេះដាស់តឿនយើងថា ផលប៉ះពាល់នៃសង្រ្គាមនេះ ក៏នឹងមានឥទ្ធិពលយូរអង្វែងផងដែរ ហើយនឹងមិនត្រឹមតែនៅក្នុងតំបន់ហ្គាហ្សានោះតេ” ។
លោកបានបន្ថែមថា “សង្រ្គាមកំពុងបង្កើនល្បឿន នៃភាពក្រីក្រយ៉ាងឆាប់រហ័សនៅក្នុងប្រជាជន ដែលងាយរងគ្រោះរួចមកហើយ មុនពេលដែលវិបត្តិនេះឈានដល់ ៕
ប្រែសម្រួល ឈូក បូរ៉ា
