ភ្នំពេញ ៖ លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានលើកឡោះងថា ចក្ខុវិស័យរបស់ក្រសួងទៅថ្ងៃអនាគត គឺជំរុញឱ្យការបម្រើសេវាសុខាភិបាល ឱ្យកាន់តែល្អប្រសើរឡើង ជាពិសេសសេវាពិនិត្យ និងថែទាំអ្នកជំងឺអេដស៍» ។
ការលើកឡើងរបស់សាស្រ្តាចារ្យរដ្ឋមន្រ្តីនេះ ក្នុងជំនួបជាមួយលោកអៀង មូលី ទេសរដ្ឋមន្រ្តីទទួលបេសកកម្មពិសេស និងជាប្រធានអាជ្ញាធរជាតិប្រយុទ្ធនឹងជំងឺអេដស៍ និងលោកស្រី វីននី ប៊ីយ៉ានីម៉ា (Winnie BYANYIMA) នាយកប្រតិបត្តិអង្គការសហប្រជាជាតិប្រយុទ្ធនឹងជំងឺអេដស៍ (UNAIDS) នាថ្ងៃ១២ ឧសភា។
សាស្រ្តាចារ្យរដ្ឋមន្រ្តីក្រសួងសុខាភិបាល បានមានមតិស្វាគមន៍ លោកស្រី Winnie BYANYIMA ដែលបានមកទស្សនកិច្ចនៅកម្ពុជា និងបានចូលរួមក្នុងកិច្ចពិភាក្សាការងារ ក្នុងការឆ្លើយតបនឹងមេរោគអេដស៍នៅកម្ពុជា។ មិនតែប៉ុណ្ណោះ សាស្រ្តាចារ្យ ក៏បានថ្លែងអំណរគុណចំពោះការបន្តគាំទ្ររបស់អង្គការ UNAIDS ក្នុងបេសកកម្មបញ្ចប់ការរីករាលដាលនៃជំងឺអេដស៍នៅកម្ពុជា។ សាស្រ្តាចារ្យរដ្ឋមន្រ្តី ក៏បានវាយតម្លៃខ្ពស់ ចំពោះការគាំទ្ររបស់អង្គការ UNAIDS និងថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍ ក្នុងការបំពេញកាតព្វកិច្ចដ៏សំខាន់នេះ។
សាស្រ្តាចារ្យរដ្ឋមន្រ្តី បានលើកឡើងនូវចំណុចមួយចំនួន ដែលក្រសួងបាននិងកំពុងបំពេញបេសកកម្មដ៏សំខាន់ ដូចខាងក្រោម ៖ ក្រសួងសុខាភិបាល បានចូលរួមយ៉ាងសកម្ម និងសហការក្នុងអន្តរវិស័យ ដើម្បីឆ្លើយតបនឹងបញ្ហាមេរោគអេដស៍យ៉ាងមានប្រសិទ្ធភាព។ បន្ថែមពីនេះ រាជរដ្ឋាភិបាលកម្ពុជាដែលមានក្រសួងសុខាភិបាល ជាសេនាធិការ បានសហការជាមួយដៃគូអភិវឌ្ឍន៍ អង្គការក្រៅរាជរដ្ឋាភិបាល សហគមន៍ និងសង្គមស៊ីវិល ក្នុងការងារប្រយុទ្ធប្រឆាំងនឹងជំងឺអេដស៍នៅកម្ពុជា ដើម្បីឆ្លើយតបឱ្យបាននូវគោលនយោបាយជាតិការបញ្ចប់ជំងឺអេដស៍ ឆ្នាំ២០២៣-២០២៨។ ក្រសួងសុខាភិបាល ទទួលបានការគាំទ្ររបស់ដៃគូអភិវឌ្ឍន៍ បានផ្តល់អាទិភាពក្នុងការធ្វើសមាហរណកម្មសេវាធ្វើតេស្តរកមេរោគអេដស៍ និងការថែទាំសុខភាព នៅក្នុងប្រព័ន្ធសុខាភិបាលថ្នាក់ជាតិ។ ចំណុចសំខាន់នោះគឺ ពង្រឹងលើការបម្រើសេវាថែទាំសុខភាពសម្រាប់អ្នកផ្ទុកមេរោគអេដស៍ នៅតាមមូលដ្ឋានសុខាភិបាលកម្រិតបឋម។ ស្របពេលក្រសួងកំពុងពង្រឹងក្នុងការឆ្លើយតបនឹងជំងឺអេដស៍ ប្រកបដោយប្រសិទ្ធភាព ក្រសួងក៏បានជំរុញនៃការលើកកម្ពស់ក្នុងការបញ្ឈប់ការរើសអើង ចំពោះអ្នកផ្ទុកមេរោគអេដស៍ផងដែរ។
ក្នុងជំនួបនេះដែរ លោកស្រី Winnie BYANYIMA បានកោតសរសើរកម្ពុជា ជាពិសេសក្រសួងសុខាភិបាលដែលបានខិតខំប្រឹងប្រែងក្នុងការឆ្លើយតបនឹងមេរោគអេដស៍នៅកម្ពុជា ដែលសម្រេចបានលទ្ធផល ៩៥-៩៥-៩៥ ជាភាគរយខ្ពស់ ប្រៀបធៀបនឹងគោលដៅដាក់ចេញ ដែលកម្ពុជាធ្លាប់ជាប្រទេសមានអត្រាប្រេវ៉ាឡង់អ្នកផ្ទុកមេរោគអេដស៍ខ្ពស់ ក្នុងតំបន់អាស៊ីប៉ាស៊ីហ្វិក គឺ៣% ក្នុងឆ្នាំ១៩៩៦ ហើយធ្លាក់ចុះមកនៅត្រឹមតែ០.៥% ក្នុងឆ្នាំ២០២៤៕
