តូក្យូ៖ អ្នកចរចាជប៉ុន និងអាមេរិកបានព្រមព្រៀងគ្នា កាលពីថ្ងៃសុក្រ ដើម្បីបន្តកិច្ចពិភាក្សាឆ្ពោះ ទៅរកកិច្ចព្រមព្រៀងពន្ធ ដែលនឹងផ្តល់ផលប្រយោជន៍ ដល់ប្រទេសទាំងពីរ ។
រដ្ឋាភិបាលជប៉ុនបានឲ្យដឹងថា អ្នកចរចាពន្ធកំពូល របស់ខ្លួនគឺលោក Ryosei Akazawa និងរដ្ឋមន្ត្រីពាណិជ្ជកម្មអាមេរិកលោក Howard Lutnick បានជួបពិភាក្សាគ្នា នៅទីក្រុងវ៉ាស៊ីនតោន ដោយភាគីនីមួយៗបានអះអាងឡើងវិញ នូវជំហររបស់ខ្លួនក្នុងអំឡុង ពេលកិច្ចពិភាក្សា ប្រកបដោយផ្លែផ្កា លើការពង្រីកពាណិជ្ជកម្ម វិធានការមិនមែនពន្ធគយ និងកិច្ចសហប្រតិបត្តិការសន្តិសុខសេដ្ឋកិច្ច។
ជំនួបរវាងលោល Akazawa និងលោក Lutnick ដែលមានរយៈពេលប្រហែលមួយម៉ោង បានធ្វើឡើងខណៈដែលប្រធានាធិបតីអាមេរិកលោក ដូណាល់ ត្រាំ និងក្រុមពាណិជ្ជកម្មរបស់គាត់ បានណែនាំកាន់តែខ្លាំងឡើងថា ពួកគេអាចផ្តល់ ឱ្យដៃគូពាណិជ្ជកម្ម ឥឡូវនេះក្នុងការពិភាក្សាជាមួយទីក្រុងវ៉ាស៊ីនតោន នូវពេលវេលាបន្ថែមទៀតដើម្បីចរចាលើសពីដើមខែកក្កដា នៅពេលដែលការផ្អាករយៈពេល ៩០ថ្ងៃ របស់រដ្ឋបាលរបស់លោកលើអ្វីដែលគេហៅថាពន្ធគយ ដែលនឹងត្រូវផុតកំណត់ ។
រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent បានឲ្យដឹងកាលពីថ្ងៃសុក្រថារដ្ឋបាលលោក ត្រាំ អាចបញ្ចប់ការចរចាជាមួយដៃ គូពាណិជ្ជកម្មសំខាន់ៗនៅថ្ងៃទី១ ខែកញ្ញា ។
នៅក្នុងបទសម្ភាសន៍របស់ Fox Business លោក Bessent បានលើកឡើងថា “ខ្ញុំគិតថាយើងអាចបញ្ចប់ពាណិជ្ជកម្មដោយទិវាពលកម្ម” ប្រសិនបើសហរដ្ឋអាមេរិកអាចធ្វើកិច្ចព្រមព្រៀង “១០ ឬ ១២” ក្នុងចំណោមដៃគូពាណិជ្ជកម្មដែលមានអាទិភាពខ្ពស់បំផុតចំនួន ១៨ របស់ខ្លួន ហើយបិទ “ទំនាក់ទំនង ២០ ដ៏សំខាន់ផ្សេងទៀត” ជាមួយនឹងកិច្ចព្រមព្រៀងថ្មី។
គួរបញ្ជាក់ថា ប្រទេសជប៉ុនស្ថិតក្នុងចំណោមដៃគូពាណិជ្ជកម្មទាំង ១៨ រួមទាំងសហភាពអឺរ៉ុប ឥណ្ឌា និងកូរ៉េខាងត្បូងផងដែរ ដែលរដ្ឋបាលលោក ត្រាំ បានផ្តល់អាទិភាពក្នុងការធ្វើកិច្ចព្រមព្រៀង៕
ប្រែសម្រួល ឈូក បូរ៉ា
