សម្ដេចតេជោ ហ៊ុន សែន ចូលបុណ្យសព លោក អ៊ុន សិទ្ធា ចំនួន ៣០លានរៀល
ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ និង សម្តេចគតិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចបានចូលបុណ្យ បច្ច័យចំនួន ៣០,០០០,០០០រៀល តាមរយៈ លោក ហ្វៃ សំអាង រួមជាមួយលោកជំទាវ ចន ច័ន្ទលក្ខិណា បានយកទៅប្រគល់ជូនដល់គ្រួសារសព របស់លោក អ៊ុន សិទ្ធា ដែលបានទទួលមរណភាពដោយ ជម្ងឺដំបៅក្រពះ នៅថ្ងៃពុធ ១៤រោច ខែកត្តិក ឆ្នាំម្សាញ់ ត្រូវនឹងថ្ងៃទី១៩ ខែ វិច្ឆិកា ឆ្នាំ២០២៥ វេលាម៉ោង ៥:០០ល្ងាច ។
ស្នាដៃសិល្បៈរបស់លោក អ៊ុន សិទ្ធា លោកមានកិត្តិយសបានសម្ដែងនៅក្នងរឿង កូនប្រុសក្រោមពន្លឺព្រះចន្ទពេញបូរណ៍មី របស់ទូរទស្សន៍ បាយ័ន ភាពយន្តចម្រៀង ទុក្ខស្រីប្តីព្រាត់ របស់សមាគមសិល្បករខ្មែរ ដែលក្នុងអាណត្តិលោកជំទាវ ចន ច័ន្ទលក្ខិណា ជាប្រធាន ។
លោកធ្លាប់ជាប់លេខ១ ប្រុសស្អាត របស់ទូរទស្សន៍ CTN ធ្លាប់ជាពិធីករកម្មវិធីអប្សរា Award របស់ទូរទស្សន៍ អប្សរា រួមនឹងស្នាដៃភាពយន្ត សិល្បៈជាច្រើនទៀត។
ស្នាដៃភាពយន្តចុងក្រោយ រឿង អប្សរាមហាអង្គរ របស់ផលិតកម្ម រស្មីហង្សមាស និង ទូរទស្សន៍ ហង្សមាស មិនទាន់ចាក់បញ្ចាំងនៅឡើយ។ គ្រួសាររបស់លោក អ៊ុន សិទ្ធា បានសំពះគោរពថ្លែងអំណរគុណយ៉ាងអនេកដល់សម្តេចទាំងទ្វេ និងសូមបួងសួងដល់វត្ថុស័ក្ដិសិទ្ធិប្រទានពរជ័យដល់សម្តេចតេជោនិងក្រុមគ្រួសារ មានសុខភាពល្អបរិបូរណ៍ មានព្រះជន្មនាយុយឺនយូរ ដេីម្បីជាម្លប់ដល់ប្រជាជនកម្ពុជា៕
