អ៊ីរ៉ង់ ព្រមានសហរដ្ឋអាមេរិក និងអ៊ីស្រាអែល អំពីការប៉ុនប៉ងវាយប្រហារ ណាមួយមុនពិធីដង្ហែសពមេដឹកនាំកំពូលលោក Khamenei
បេទេស៖ មេបញ្ជាការយោធាអ៊ីរ៉ង់ម្នាក់កាលពីថ្ងៃព្រហស្បតិ៍ បានព្រមានសហរដ្ឋអាមេរិក និងអ៊ីស្រាអែល អំពីការវាយប្រហារណាមួយលើអ៊ីរ៉ង់ ខណៈពេលដែលអ៊ីរ៉ង់កំពុងត្រៀមរៀបចំសម្រាប់ ពិធីបុណ្យសពរដ្ឋរបស់មេដឹកនាំកំពូល Ayatollah Ali Khamenei ដែលត្រូវបានសម្លាប់នៅក្នុងការវាយប្រហារ តាមអាកាសនៅថ្ងៃដំបូងនៃសង្គ្រាម។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៣ ខែកក្កដា ឆ្នាំ២០២៦ថា លោក Ali Abdollahi មេបញ្ជាការនៃទីស្នាក់ការកណ្តាល Khatam al-Anbiya បានមានប្រសាសន៍នៅក្នុងសេចក្តីថ្លែងការណ៍មួយដែលផ្សាយដោយប្រព័ន្ធផ្សព្វផ្សាយរដ្ឋថា “យើងព្រមានសត្រូវរបស់អ៊ីរ៉ង់ ជាពិសេសសហរដ្ឋអាមេរិក និងរបប Zionist (អ៊ីស្រាអែល) ឱ្យជៀសវាងការគណនាខុសណាមួយ និងត្រូវគិតអំពីការសងសឹកដ៏ឃោរឃៅដែលកងកម្លាំងប្រដាប់អាវុធរ បស់យើងនឹងធ្វើចំពោះការគំរាមកំហែង និងការឈ្លានពានណាមួយប្រឆាំងនឹងប្រទេសរបស់យើង”។
ក្បួនដង្ហែសពសម្រាប់លោក Khamenei នឹងចាប់ផ្តើមនៅថ្ងៃទី ៤ ខែកក្កដា នៅទីក្រុងតេអេរ៉ង់ និងបញ្ចប់នៅថ្ងៃទី ៩ ខែកក្កដា ជាមួយនឹងការបញ្ចុះសពនៅក្នុងស្រុកកំណើតរបស់គាត់គឺ Mashhad ជាមួយនឹងពិធីបន្ថែមដែលបានគ្រោងទុកនៅទីក្រុង Qom និងអ៊ីរ៉ាក់នៅចន្លោះកាលបរិច្ឆេទទាំងនេះ។
កាលពីថ្ងៃពុធ រដ្ឋមន្ត្រីការបរទេសអ៊ីរ៉ង់ លោក Abbas Araqchi បានព្រមានស្រដៀងគ្នានេះថា ទីក្រុងតេអេរ៉ង់នឹងផ្តល់ការឆ្លើយតបភ្លាមៗ និងខ្លាំងក្លាចំពោះការគំរាមកំហែង ណាមួយប្រឆាំងនឹងប្រជាជន ឬថ្នាក់ដឹកនាំរបស់ខ្លួន បន្ទាប់ពីរដ្ឋមន្ត្រីក្រសួងការពារជាតិ អ៊ីស្រាអែល លោក Israel Katz បានអត្ថាធិប្បាយថា មេដឹកនាំកំពូលបច្ចុប្បន្នរបស់អ៊ីរ៉ង់ លោក Mojtaba Khamenei «ស្ថិតក្នុងបញ្ជីតាមសម្លាប់»។
