បរទេស៖ រដ្ឋាភិបាលចិន តាមសេចក្តីរាយការណ៍ បាននិយាយនៅពេលថ្មីៗនេះថា ខ្លួននឹងបរិច្ចាគប្រាក់ ៣០លានដុល្លារបន្ថែមទៀត ឲ្យដល់អង្គការសុខភាពពិភពលោក ដើម្បីជួយបំពេញនូវចន្លោះកង្វះថវិកា ឧបត្ថម្ភបន្សល់ទុកដោយប្រធានាធិបតី សហរដ្ឋអាមេរិក លោក ដូណាល់ ត្រាំ។
យោងតាមសេចក្តីរាយការណ៍មួយ ដែលចេញផ្សាយដោយ ទីភ្នាក់ងារសារព័ត៌មាន UPI នៅថ្ងៃទី២៤ ខែមេសា ឆ្នាំ២០២០ បានឲ្យដឹងថា ក្រសួងការបរទេស បាននិយាយថា ការបរិច្ចាគនេះ ឆ្លុះបញ្ចាំងពីការគាំទ្រ និងជំនឿទុកចិត្ត ដែលប្រជាជននិងរដ្ឋាភិបាលចិន មានចំពោះអង្គការសុខភាពពិភពលោក។
មន្ត្រីនាំពាក្យ ក្រសួងការបរទេសចិន លោក Geng Shuang បានមានប្រសាសន៍ថា ប្រាក់ដែលរួមបញ្ចូលគ្នា ជាមួយប្រាក់២០លានដុល្លារ ដែលខ្លួនបានឲ្យកាលពីខែមុននេះ នឹងគាំទ្រដល់ ការប្រយុទ្ធប្រឆាំងជាសលក ចំពោះមេរោគកូវីដ១៩ និងជួយពង្រឹង ដល់ប្រព័ន្ធសុខាភិបាល របស់ប្រទេសកំពុងតែអភិវឌ្ឍនានា៕ ប្រែសម្រួល៖ប៉ាង កុង
