កាលពីថ្ងៃអង្គារ សឹង្ហបុរី រកឃើញអ្នកឆ្លងជំងឺកូវីដ១៩ ចំនួន ៥២៨នាក់ បន្ថែមទៀត សរុបអ្នកឆ្លង ១៤.៩៥១នាក់

បរទេស៖ ក្រសួងសុខាភិបាលសឹង្ហបុរី (MOH) បានរាយការណ៍ករណីឆ្លងមេរោគកូវីដ១៩ ចំនួន ៥២៨ ករណីកាលពីថ្ងៃអង្គារ ដែលនាំឱ្យមានករណីដែល បានបញ្ជាក់ឆ្លងសរុប នៅក្នុងដែនដីនេះ កើនដល់ ១៤.៩៥១ នាក់។

យោងតាមទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃទី២៩ ខែមេសា ឆ្នាំ២០២០ បានឱ្យដឹងថា ក្នុងចំណោមករណីដែលបានបញ្ជាក់ថ្មីៗ ១០ ករណីត្រូវបានគេរក ឃើញនៅក្នុងសហគមន៍ ក្នុងនោះ ៧ នាក់ជាអ្នកកាន់លិខិត អនុញ្ញាតការងារដែល ស្នាក់នៅក្រៅអន្តេវាសិកដ្ឋាន ហើយ ៥១១នាក់ ជាអ្នកកាន់ប័ណ្ណការងារ ដែលស្នាក់នៅក្នុងអន្តេវាសិកដ្ឋាន។

ក្នុងអំឡុងពេលមួយថ្ងៃមុន អ្នកជំងឺ ៣៣ នាក់បន្ថែមទៀតនៃការឆ្លងមេរោគ ត្រូវបានរំសាយចេញពីមន្ទីរពេទ្យ ឬកន្លែងដាច់ឆ្ងាយពីសហគមន៍។ ជារួម ១.១២៨ នាក់បានជាសះស្បើយ ហើយត្រូវបានរំសាយចេញពីមន្ទីរពេទ្យឬកន្លែងដាច់ឆ្ងាយពីសហគមន៍។

បច្ចុប្បន្នមានករណីដែលត្រូវបានបញ្ជាក់ចំនួន ១.៨៨៩ នាក់ដែលកំពុងសម្រាកព្យាបាលនៅមន្ទីរពេទ្យនៅឡើយ។ អ្នកជំងឺទាំងនេះភាគច្រើនមានស្ថេរភាព ឬមានស្ថានភាពប្រសើរឡើង ហើយ ២១នាក់ ស្ថិតនៅក្នុងស្ថានភាពធ្ងន់ធ្ងរ ។ អ្នកជម្ងឺប្រមាណ ១១.៩២០ នាក់នៅដាច់ដោយឡែក និងមើលថែនៅតាមសហគមន៍នានា៕

ប្រែសម្រួលៈ ណៃ តុលា