ភ្នំពេញ៖ ស្ថានទូតឥណ្ឌា ប្រចាំទីក្រុងភ្នំពេញ មានសេចក្តីរីករាយ សូមប្រកាសថា រដ្ឋាភិបាលឥណ្ឌាបានយល់ព្រម ផ្តល់ថ្នាំវ៉ាក់សាំង COVID-១៩ ចំនួន ១០ម៉ឺនដូស ដល់ព្រះរាជាណាចក្រកម្ពុជា ជាបន្ទាន់។ ។ នេះបើតាមសេចក្តីប្រកាសព័ត៌មានរបស់ស្ថានទូតឥណ្ឌា នៅថ្ងៃសៅរ៍ ទី៦ ខែកុម្ភៈ ឆ្នាំ២០២១។
ប្រភពដដែលបញ្ជាក់ថា “នេះជាការឆ្លើយតបទៅនឹងសំណើ របស់សម្តេចនាយករដ្ឋមន្រ្តី ហ៊ុន សែន ចំពោះលោកនាយករដ្ឋមន្រ្តី Shri Narendra Modi សម្រាប់ជំនួយ ក្នុងការផ្គត់ផ្គង់វ៉ាក់សាំង ការពារអាយកូវីដ- ១៩” ។
ស្ថានទូតឥណ្ឌ បានបញ្ជាក់ផងដែរថា “ការផ្គត់ផ្គង់ត្រូវបានធានា តាមរយៈវិទ្យាស្ថាន Serum នៃប្រទេសឥណ្ឌា ទោះបីជាមានសំណើប្រកួតប្រជែង រាប់មិនអស់ ពីបណ្តាប្រទេសដៃគូ និងការប្តេជ្ញាចិត្តរបស់យើង ចំពោះប្រជាជន ក្នុងស្រុករបស់យើង ក៏ដោយ”។
សេចក្តីសម្រេចនេះ គឺជាសក្ខីភាពមួយបង្ហាញពី ការកោតសរសើររបស់ឥណ្ឌា ចំពោះប្រទេសកម្ពុជា ដែលជាដៃគូសំខាន់ និងជាក្តីបារម្ភរបស់ខ្លួន ចំពោះសុខភាព និងវិបុលភាព របស់ប្រជាជនកម្ពុជា។
ដោយៈ សយ សុភា
