ព្រុចសែល៖ ជាមួយនឹងអឺរ៉ុបឥឡូវនេះជាចំណុចកណ្តាលនៃជំងឺរាតត្បាតកូវីដ-១៩ បណ្តាប្រទេសនៅអឺរ៉ុបកំពុងដាក់ចេញនូវវិធានការថ្មី ដើម្បីទប់ស្កាត់ការកើនឡើងនៃករណីឆ្លង នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ក្នុងនោះ គឺការរឹតបន្តឹងលើអ្នកដែលមិនបានទទួលថ្នាំបង្ការ។ ទីក្រុងបឺលីន បានឲ្យដឹងកាលពីថ្ងៃពុធសប្តាហ៍មុនថា ចាប់ពីថ្ងៃច័ន្ទ រដ្ឋធានីប៊ែរឡាំងរបស់ប្រទេសអាល្លឺម៉ង់ នឹងហាមឃាត់អ្នក ដែលមិនបានទទួលថ្នាំបង្ការពីភោជនីយដ្ឋាន បារ រោងកុន និងកន្លែងកម្សាន្តផ្សេងៗទៀត។
លើសពីនេះទៅទៀត ព្រឹត្តិការណ៍ក្រៅផ្ទះដែលមានមនុស្សច្រើនជាង ២០០០នាក់ក៏នឹងមិនមានដែនកំណត់ ចំពោះមនុស្សពេញវ័យ ដែលមិនបានចាក់វ៉ាក់សាំងផងដែរ។
អ្នកនាំពាក្យរដ្ឋាភិបាលអាល្លឺម៉ង់ លោក Steffen Seibert បានឲ្យដឹងថា អធិការបតីអាល្លឺម៉ងលោកស្រី Angela Merkel កំពុងជំរុញឱ្យរដ្ឋាភិបាលសហព័ន្ធ និងរដ្ឋរួមគ្នា ដើម្បីប្រឈមមុខនឹងស្ថានភាពជំងឺរាតត្បាតកាន់តែអាក្រក់នៅក្នុងប្រទេសអាល្លឺម៉ង់។
ទន្ទឹមនឹងនេះ នៅក្នុងប្រទេសអូទ្រីស គិតត្រឹមថ្ងៃច័ន្ទ មនុស្សដែលគ្មានវ៉ាក់សាំងត្រូវបានអនុញ្ញាតឱ្យចាកចេញពីផ្ទះល្វែងរបស់ពួកគេសម្រាប់ហេតុផលសំខាន់ៗដូចជាការទិញគ្រឿងទេស ការទៅជួបគ្រូពេទ្យ ឬឱសថស្ថាន ឬទៅធ្វើការ។
រដ្ឋាភិបាលអូទ្រីស បានប្រកាសកាលពីថ្ងៃអាទិត្យថា ការអនុលោមតាមវិធានការនេះនឹងត្រូវបានអនុវត្តយ៉ាងតឹងរ៉ឹង ដោយមានការផាកពិន័យរហូតដល់ ១៤៥០អឺរ៉ូ (១៦៥៣ដុល្លារអាមេរិក) សម្រាប់អ្នកដែលបំពានច្បាប់។
វិធានការដាក់ឱ្យនៅដាច់ដោយឡែកនឹងចូលជាធរមានសម្រាប់រយៈពេល ១០ថ្ងៃដំបូង ប៉ុន្តែអធិការបតីអូទ្រីស Alexander Schallenberg បានលើកឡើងថា ខេត្តអាចកំណត់ច្បាប់តឹងរ៉ឹងជាងនេះ ប្រសិនបើពួកគេចង់បាន។
ចំណែក រដ្ឋធានីវីយែន បានប្រកាសរួចហើយថា ខ្លួននឹងណែនាំច្បាប់បន្ថែមដែលតម្រូវឱ្យមានការធ្វើតេស្ត PCR សម្រាប់ពលរដ្ឋដែលបានទទួលថ្នាំបង្ការ និងសង្គ្រោះដែលចូលរួមក្នុងព្រឹត្តិការណ៍នៅពេលយប់ ដែលមានមនុស្សលើសពី ២៥នាក់៕
ដោយ ឈូក បូរ៉ា
