ម៉ានីល៖ លោកប្រធានាធិបតី ឌូទ័រតេ ចង់បាន «កិច្ចព្រមព្រៀងដែលល្អប្រសើរ» ក្នុងការជ្រើសរើសប្រធាន ប៉ូលីសជាតិហ្វីលីពីន (PNP) ដោយលោកនិយាយថា ប៉ូលីសកំពូលបន្ទាប់ គួរតែមានភាពក្លាហានគ្រប់គ្រាន់ ក្នុងការសម្លាប់មេគ្រឿងញៀនទាំងអស់។
យោងតាមសារព័ត៌មាន Philstar ចេញផ្សាយនៅថ្ងៃទី០៣ ខែធ្នូ ឆ្នាំ២០១៩ បានឱ្យដឹងថា ខណៈលោក ឌូទ័រតេ គិតថា បេក្ខជនទាំងអស់ ក្នុងតំណែងជាមេប៉ូលីសជាតិ មានកម្លាំង ១៩០,០០០ នាក់ គឺល្អហើយ តែលោក បានសារភាពថា លោកមានការលំបាកក្នុងការជ្រើសរើស ។
លោកបានប្រាប់សារព័ត៌មាន GMA News នៅក្នុងបទសម្ភាសន៍មួយ ដែលចាក់ផ្សាយកាលពីម្សិលមិញថា « ខ្ញុំមានការលំបាកជាមួយប៉ូលីស។ ខ្ញុំស្រឡាញ់ប៉ូលីស ប៉ុន្តែខ្ញុំមានការលំបាកជាមួយមន្រ្តី។ ខ្ញុំចង់មានន័យថាពួកគេល្អទាំងអស់ ប៉ុន្តែខ្ញុំចង់បានការប្រសើរជាងនេះ។ វាមិនគ្រប់គ្រាន់ទេដែលអ្នកណែនាំឱ្យខ្ញុំ។ ប្រសិនបើអ្នកប្រាប់ខ្ញុំថា “ លោក, ប្រសិនបើលោកអ្នកជ្រើសរើសខ្ញុំ ស្តេចគ្រឿងញៀនទាំងអស់នឹងត្រូវសម្លាប់ ពេលនោះតំណែងនេះ នឹងបានទៅលើអ្នក ប៉ុន្តែប្រសិនបើអ្នកមិនអាចផ្តល់ការធានាដល់ខ្ញុំទេ សូមបំភ្លេចវាចោលទៅ» ។
សូមជម្រាបថា លោក Oscar Albayalde អតីតមេប៉ូលីសជាតិហ្វីលីពីន បានលាឈប់ពីតំណែងកាលពីថ្ងៃទី ១៤ ខែតុលា ដោយសារជាប់ចោទពីបទថា បានធ្វើអន្តរាគមន៍ ក្នុងករណីអតីតមន្ត្រីក្រោមឱវាទ ហៅថា “ ប៉ូលីសនីនចា” ដែលជាប់ពាក់ព័ន្ធនឹងការលក់គ្រឿងញៀន ដែលរឹបអូសបាននៅក្នុងការវាយឆ្មក់នៅ Pampanga ក្នុងឆ្នាំ ២០១៣ ៕
ប្រែសម្រួលៈ ណៃ តុលា
