ម៉ូហ្គាឌីស៊ូ៖ ទីភ្នាក់ងារព័ត៌មានចិនស៊ិនហួ បានចុះផ្សាយ នៅថ្ងៃទី១១ ខែធ្នូ ឆ្នាំ២០១៩ថា ប៉ូលិសបានបញ្ជាក់ឲ្យដឹងនៅថ្ងៃពុធនេះថា ចំនួនអ្នកស្លាប់ ដោយសារការវាយប្រហារមួយកាលពីល្ងាចថ្ងៃអង្គារ នៅឯសណ្ឋាគារមួយ ស្ថិតនៅក្នុងប្រទេសសូម៉ាលី រដ្ឋធានី ម៉ូហ្គាឌីស៊ូ បានកើនឡើងដល់១០នាក់ ខណៈដែល១១នាក់ផ្សេងទៀតបាន រងរបួស ។
លោកស្រី Zakia Hussein ស្នងការរង នៃកងកម្លាំង ប៉ូលិសរបស់ប្រទេសសូម៉ាលី បានថ្លែងថា កងសន្តិសុខ បានបញ្ចប់សកម្មភាព វាយប្រហារដោយ ប្រើពេលអស់៧ម៉ោង នៅឯសណ្ឋាគារមួយឈ្មោះថា SYL Hotel បន្ទាប់ ពីបានបាញ់សម្លាប់ ក្រុមភេរវករដែលមានគ្នា៥នាក់ ។
លោកស្រី Hussein បានថ្លែងថា កងសន្តិសុខ បានជម្លៀសពលរដ្ឋចំនួន ៨២នាក់ទៅកាន់ទីមានសុវត្ថិភាព ដែលបានជាប់ ក្នុងសណ្ឋាគារនោះ ក្នុងនោះរាប់បញ្ចូលទាំងតួលេខមួយចំនួនទៀត ។ គេបានដឹងថា សណ្ឋាគារ នេះ ជារឿយៗមានក្រុមមន្ត្រីរដ្ឋាភិបាល និងអ្នកជំនួញធំៗចូលមកស្នាក់នៅទីនេះ ៕ ប្រែសម្រួលដោយ៖ ម៉ៅ បុប្ផាមករា
