សេអ៊ូល៖ ឯកអគ្គរដ្ឋទូតកូរ៉េខាងត្បូង ប្រចាំនៅសហរដ្ឋអាមេរិក លោក Lee Soo-hyuck បានស្នើឱ្យប្រធានាធិបតី សហរដ្ឋអាមេរិកលោក ដូណា ល់ ត្រាំ ដើម្បីបន្តបង្ហាញភាព ជាអ្នកដឹកនាំលើបញ្ហា នុយក្លេអ៊ែរកូរ៉េខាងជើង ហើយលោក ត្រាំ ក៏បានលើកឡើងជាការឆ្លើយតបថា លោកនឹងធ្វើដូច្នេះ។
ស្ថានទូតបានឲ្យដឹងនៅក្នុងសេចក្តីប្រកាសព័ត៌មានមួយថាលោកលី បានធ្វើសំណើរក្នុងអំឡុងពេលពិធីសេតវិមាន ដើម្បីបង្ហាញលិខិតសម្គាល់របស់លោកដល់លោកប្រធានាធិបតី ដូណាល់ ត្រាំ ។ លោកលី ស្ថិតក្នុងចំណោមឯកអគ្គរដ្ឋទូតថ្មីចំនួន ៦ រូបដែលបានបង្ហាញលិខិត សម្គាល់ខ្លួនរួមមានអ្នកតំណាង មកពីទីម័រខាងកើត ថៃ និងអូទ្រីស។
ស្ថានទូតបានឲ្យដឹងទៀតថា “ ឯកអគ្គរដ្ឋទូតលោក លី បានលើកឡើងពីក្ដីសង្ឃឹមរបស់លោកថា លោកប្រធានាធិបតី ត្រាំ នឹងបន្តបង្ហាញភាពជាអ្នកដឹកនាំ ដើម្បីដោះស្រាយបញ្ហានុយក្លេអ៊ែរកូរ៉េខាងជើង និងបង្កើតសន្តិភាពនៅឧបទ្វីបកូរ៉េ”៕
ដោយ ឈូក បូរ៉ា
